Mierc zajaviŭ pra zaviaršeńnie «ery biezumoŭnaha transatłantyčnaha siabroŭstva»

Fiederalny kancler Hiermanii Frydrych Mierc 17 vieraśnia zajaviŭ, što epocha «biezumoŭnaha transatłantyčnaha siabroŭstva» pamiž ZŠA i Jeŭropaj, jakaja farmavałasia paśla Druhoj suśvietnaj vajny, vierahodna, skončyłasia na ahladnuju budučyniu, piša Bloomberg.

Frydrych Mierc. Fota: AP Photo/Matthias Schrader

Vystupajučy pierad členami svajoj partyi ŭ Bierlinie, Mierc adznačyŭ, što ŭ Złučanych Štatach źmianiajucca palityčnyja pohlady i staŭleńnie da transatłantyčnaha aljansu. Pavodle jaho słoŭ, raniej jeŭrapiejskija krainy nie mahli pradbačyć takich pieramien

«Heta era biezumoŭnaha transatłantyčnaha siabroŭstva, vierahodna, skončyłasia ŭ ahladnaj budučyni», — paviedamiŭ Frydrych Mierc.

Zajava niamieckaha kanclera prahučała na fonie čarhovaj napružanaści ŭ adnosinach pamiž Vašynhtonam i Brusielem. Prezident ZŠA Donald Tramp adreahavaŭ na prapanovu zrabić Kanadu asacyjavanym členam Jeŭrasajuza pahrozami ŭvieści novyja myty suprać jeŭrapiejskich krain, kali paličyć takoje supracoŭnictva škodnym dla Amieryki. Jon taksama dapuściŭ spynieńnie handlu ź Jeŭropaj pa asobnych napramkach.

Paźniej Tramp zajaviŭ, što ZŠA nibyta «ciahnuć na sabie» jeŭrapiejskija krainy, ź jakimi majuć handlovy deficyt na 200 miljardaŭ dalaraŭ. Jon śćviardžaŭ, što Vašynhton moža prosta admovicca ad handlu ź Jeŭropaj.

Pahrozy ŭ bok Jeŭrasajuza Tramp vykazvaŭ i raniej. Siarod ich byli płany ŭvieści 50‑pracentnyja myty na jeŭrapiejskija tavary, abmiežavać dostup ES da amierykanskaha rynku ŭzbrajeńniaŭ i skaracić kolkaść amierykanskich vajskoŭcaŭ u Jeŭropie.

Vydańnie Bloomberg adznačaje, što słovy Mierca nahadvajuć zajavu byłoj kanclerki Hiermanii Anhieły Mierkiel u mai 2017 hoda. Tady, padčas pieršaha prezidenckaha terminu Trampa, jana skazała, što nadziejnyja stasunki, stvoranyja paśla Druhoj suśvietnaj vajny, «u peŭnaj stupieni stračanyja».

Kamientary da artykuła