Biełarusy prydumali, jak štučna razvodzić račnych rakaŭ

Biełaruskija navukoŭcy raspracavali technałohiju pramysłovaha raźviadzieńnia račnych rakaŭ u zakrytych basiejnach. Śpiecyjalisty Biełaruskaj dziaržaŭnaj sielskahaspadarčaj akademii stvaryli inkubacyjnuju ŭstanoŭku, jakaja, pavodle raspracoŭščykaŭ, dazvalaje pavysić zachavanaść ličynak da 90%. Heta moža stvaryć umovy dla vyroščvańnia rakaŭ u vialikich abjomach na śpiecyjalizavanych fiermach, piša vydańnie Fishingby.

Fota ilustracyjnaje

Raźviadzieńnie rakaŭ ličycca składanaj zadačaj, bo hetyja žyvioły adčuvalnyja da tempieratury i jakaści vady. Asnoŭnaja ŭvaha navukoŭcaŭ była nadadzienaja najbolš uraźlivamu etapu — pierachodu ad ikry da maładoha raka.

U pryrodzie vynošvańnie ikry moža doŭžycca kala vaśmi miesiacaŭ. Daśledčyki płanujuć pravodzić inkubacyju pry tempieratury kala 18 hradusaŭ i skaracić hety termin prykładna da troch miesiacaŭ. Kali raźlikovyja pakazčyki paćvierdziacca, technałohija dazvolić chutčej atrymlivać maładniak i pierajści da pramysłovych abjomaŭ vytvorčaści.

Raspracoŭka praciahvałasia kala 20 hadoŭ, u joj udzielničali niekalki pakaleńniaŭ navukoŭcaŭ i studentaŭ akademii. Ciapier technałohija prachodzić patentavańnie, jakoje płanujuć zaviaršyć viasnoj.

Pieršapačatkova daśledčyki zasiarodzilisia na raźviadzieńni vuzkapałaha raka, kolkaść jakoha ŭ biełaruskich vadajomach za apošnija hady prykmietna skaraciłasia. Paśla jany chočuć zaniacca i šyrokapałym rakam, zaniesienym u Čyrvonuju knihu Biełarusi. Pramysłovaje raźviadzieńnie žyvioł moža spryjać nie tolki raźvićciu akvakultury, ale i adnaŭleńniu pryrodnych papulacyj.

Jašče adzin pierśpiektyŭny kirunak — sumiesnaje vyroščvańnie rakaŭ i ryby ŭ rybavodnych sažałkach. Heta dazvolić vykarystoŭvać užo najaŭnuju infrastrukturu haspadarak i adnačasova atrymlivać dadatkovuju pradukcyju.

Nastupnaja zadača navukoŭcaŭ — pierajści ad łabaratornych ekśpierymientaŭ da praktyčnaha ŭkaranieńnia raspracoŭki. Pavodle ich acenak, raki, vyraščanyja ŭ Biełarusi, pry stvareńni pramysłovych fiermaŭ zmohuć kankuryravać pa canie ź impartnaj pradukcyjaj.

Kamientary da artykuła