Milicyja vykłała svaju viersiju, čamu chłopiec, jaki zrabiŭ zaŭvahu turystu za niedakurak u centry Minska, pravioŭ noč u adździaleńni
Błohier pazvaniŭ u milicyju, kab jaho abaranili, dali spakojna sieści na ciahnik i źjechać dadomu. Ale ŭ vyniku sam pravioŭ noč u adździaleńni i byŭ šakavany kiepskim staŭleńniem.
Skrynšot videa. Jakaść palepšana z dapamohaj ŠI
Małady błohier pad psieŭdanimam Leŭ Biełarusaŭ staŭ viadomy paśla videa, dzie zrabiŭ zaŭvahu mužčynu, jaki na pierachodzie na Niamizie ŭ Minsku kinuŭ niedakurak na ziamlu. Situacyja mieła taki hramadski rezanans, što taho hościa stalicy pryciahnuli da administracyjnaj adkaznaści.
Ale Leŭ śćviardžaje, što paśla hetaj situacyi jaho pa ŭsioj krainie praśledujuć znajomyja taho mužčyny i pahražajuć zabić, prymianiajuć fizičnuju siłu.
Adzin ź incydentaŭ zdaryŭsia ŭ Tałačynie na parkoŭcy, dzie da jaho pryčapiŭsia nieznajomiec:
«Jon paklikaŭ inšych cyhan, jakija pačali pieraškadžać majmu pieramiaščeńniu, abmiažoŭvali prastoru. Jany kryčali: «My ciabie zaraz zabjom!». Jak vyjaviłasia paźniej, toj čałaviek, jaki pačaŭ na mianie ahryzacca, — heta rodny brat taho samaha chłopca z taho samaha videa ź niedakurkam».
Pierad hetaj sustrečaj, pa słovach Lva, na jaho napaŭ siabar toj kampanii. «Jon dastaŭ z-pad humki ŭ vokładcy majho pašparta apošnija hrošy i skazaŭ: «Heta mnie na piva». Taksama pahražaŭ žyćciu».
Junak pazvaniŭ u milicyju, kab jaho abaranili, dali spakojna sieści na ciahnik i źjechać dadomu. Ale ŭ vyniku sam pravioŭ noč u adździaleńni i byŭ šakavany kiepskim staŭleńniem.
Błohier u adździaleńni milicyi. Skrynšot videa MUS
Na rolik adreahavała MUS. Tam zajavili, što, jak tolki chłopiec pazvaniŭ im sa skarhaj, śledča-apieratyŭnaja hrupa pryjechała na vakzał i zatrymała jaho kryŭdzicielaŭ za drobnaje chulihanstva.
A noč u adździaleńni junak pravioŭ «u suviazi z praviadzieńniem nieabchodnych pracesualnych dziejańniaŭ». Siłaviki kažuć, što prapanavali Lvu pled, haračuju harbatu, ježu i miedycynskuju dapamohu i jon «pryniaŭ heta z natchnieńniem».
A za videa ŭ sacsietkach sa skarhami pryhrazili pryciahnuć da adkaznaści.
Błohier paźniej vydaliŭ svajo videa z sacsietak.