«Tramp zakryŭ YouTube u Amierycy? Nie». Ministr infarmacyi vykazaŭsia pra mahčymaść błakavańnia YouTube u Biełarusi

Ministr infarmacyi Biełarusi Dźmitryj Žuk u efiry prahramy «Kłub redaktaraŭ» na telekanale «Biełaruś 1» vykazaŭsia pra mahčymaść błakavańnia YouTube u Biełarusi ŭ adkaz na novyja vydaleńni kanałaŭ biełaruskich prapahandystaŭ.

Dźmitryj Žuk. Fota: BiełTA

Pa słovach Žuka, u hetaj situacyi važna ŭličvać niekalki momantaŭ. Jon zajaviŭ, što Biełaruś, na jaho dumku, sprabujuć spravakavać na peŭnyja dziejańni, i było b «vialikaj pamyłkaj» rabić toje, na što jaje padšturchoŭvajuć.

«Pieršy aśpiekt, jaki nam treba razumieć, — nas pravakujuć na peŭnyja kroki. I budzie najbolšaj pamyłkaj paddacca na pravakacyju i zrabić tyja kroki, na jakija nas pravakujuć», — havoryć Dźmitryj Žuk.

Ministr nazvaŭ YouTube «niedružalubnaj płatformaj» i zajaviŭ, što dziejańni płatformy z pravavoha i inšych punktaŭ hledžańnia jon ličyć «čystym piractvam».

Pry hetym Žuk adznačyŭ, što biełaruskija dziaržaŭnyja ŚMI nibyta navučylisia pracavać u takich umovach i zachoŭvajuć svaju aŭdytoryju. Pavodle jaho, rašeńni adnosna infarmacyjnaj śfiery treba prymać zychodziačy ź intaresaŭ dziaržavy i patreb hramadstva, a nie pad ciskam źniešnich abstavin.

Havoračy pra błakavańni i vydaleńni kantentu, Žuk pryvioŭ u prykład prezidenta ZŠA Donalda Trampa. Jon nahadaŭ, što YouTube vydaliŭ jaho kanał, paśla čaho ŭ sudovym pracesie z płatformy byli spahnanyja značnyja srodki.

«Tramp zakryŭ YouTube u Amierycy? Nie», — skazaŭ ministr.

Raniej u padobnym styli Dźmitryj Žuk vykazvaŭsia pra mahčymaść błakavańnia ŭ Biełarusi Youtube u krasaviku, nieŭzabavie paśla svajho pryznačeńnia.

Kamientary da artykuła