ES i Kanada stvarajuć novy aljans z udziełam inšych krain, ale biez ZŠA, Kitaja i Rasii

Jeŭrasajuz i Kanada rychtujuć stvareńnie novaha mižnarodnaha aljansu P4M — «Partniory dziela šmatbakovaści, mižnarodnaha prava, miru i roskvitu». Jaho pradstaviać u aŭtorak na palach Hienieralnaj asamblei AAN u Ńju-Jorku, piša Bild.

Premjer-ministr Kanady Mark Karni i prezidentka Jeŭrakamisii Ursuła fon der Lajen. Fota: AP Photo/Pascal Bastien

Akramia ES i Kanady, da inicyjatyvy dałučylisia Brazilija, Kienija, Indyja i Aŭstralija. Aljans budzie adkrytym farmatam, da jakoha ŭ budučyni zmohuć dałučycca inšyja dziaržavy.

Udzielniki płanujuć umacoŭvać mižnarodnaje supracoŭnictva i rolu AAN, a taksama sumiesna pracavać nad pytańniami štučnaha intelektu, źmieny klimatu i baraćby z pandemijami. Inicyjatary ličać nieabchodnym «navodzić masty» pamiž krainami z roznymi palityčnymi tradycyjami.

Novaja hrupa ŭźnikaje na fonie rostu sapiernictva pamiž bujnymi dziaržavami i kryzisu tradycyjnych mižnarodnych farmataŭ. U budučyni jana moža stać alternatyvaj «Hrupie dvaccaci» (G20), dzie supracoŭnictva ŭsio čaściej uskładniajecca roznahałośsiami pamiž viadučymi dziaržavami.

Akramia taho, ES užo prapanavaŭ Kanadzie stać pieršym u historyi «asacyjavanym členam» Jeŭrasajuza. Havorka idzie pra asabliva ciesnaje supracoŭnictva ŭ ekanomicy, technałohijach, enierhietycy i abaronie.

Kamientary da artykuła