U Minsku vysadziać bolš za 40 tysiač chryzantem
Uvosień vulicy Minska ŭpryhožać bolš za 40 tysiač chryzantem. Pra heta 21 vieraśnia na apieratyŭnaj naradzie ŭ Minharvykankamie paviedamiŭ hienieralny dyrektar «Minskzielenbuda» Alaksandr Jermałovič, piša ahienctva «Minsk-Naviny».
Zdymak ilustracyjny. Fota: magnific.com
Kvietki vysadziać na kłumbach, viertykalnych kanstrukcyjach i raździalalnych pałosach daroh. Pa słovach Jermałoviča, u Minsku ŭžo kala piaci hadoŭ z nadychodam prachałodnaha i vilhotnaha nadvorja, paśla zakančeńnia ćvicieńnia ampielnych raślin, vysadžvajuć chryzantemy. Jany pavinny ciešyć haradžan da poźniaj vosieni.
Da kanca hoda ŭ stalicy taksama płanujuć vysadzić bolš za 10 tysiač dreŭ i 130 tysiač kustoŭ. Usie hetyja raboty praduhledžanyja štohadovym płanam azielanieńnia, uparadkavańnia i kvietkavaha afarmleńnia Minska.
Paralelna ŭ horadzie rychtujucca da zimy. Kab abaranić drevy ŭzdoŭž asnoŭnych praśpiektaŭ i vulic ź intensiŭnym rucham ad reahientaŭ, ich płanujuć abharnuć čarotavymi matami.
Jašče adna siezonnaja praca — abrezka dreŭ. Na hety momant jana praviedzienaja dla 21 tysiačy raślin, jašče kala čatyroch tysiač dreŭ treba abrezać.
U Minsku taksama rehularna abśledujuć zialonyja nasadžeńni i vyjaŭlajuć drevy, jakija znachodziacca ŭ nienaležnym stanie. Kali adpaviednaje zaklučeńnie paćviardžaje nieabchodnaść ich vydaleńnia, pravodziacca adpaviednyja raboty. Z pačatku hoda da siaredziny vieraśnia ŭ stalicy ŭžo prybrali kala piaci tysiač takich dreŭ, i hetaja praca praciahvajecca.
Staršynia Minharvykankama Uładzimir Kucharaŭ asobna źviarnuŭ uvahu na baraćbu z kaštanavaj mollu, jakaść pasadačnaha materyjału i vybar miescaŭ, najbolš prydatnych dla vysadki dreŭ.
Čytajcie taksama:
Pad Minskam žančyna stvaryła na 45 sotkach kvietkavaje karaleŭstva
U Minsku sioleta vysadziać bolš za 1,2 miljona kvietak
U «Minskzialenbudzie» prakamientavali źjaŭleńnie na minskim praśpiekcie lip u vazonach