«Kašalok Łukašenki» buduje na małoj radzimie «duchoŭny kompleks» za bolš čym miljon dalaraŭ

Viadomy praŭładny biznesmien Alaksandr Zajcaŭ płanuje pabudavać u Pružanach katalicki duchoŭny kompleks koštam bolš za miljon dalaraŭ. Na dumku inicyjatyvy «Chryścijanskaja vizija», jakaja praviała admysłovaje rasśledavańnie, hety prajekt moža być častkaj bolš maštabnaj zadumy biznesmiena, źviazanaj z budaŭnictvam chramaŭ i raźmiaščeńniem u ich darahich abrazoŭ.

Raniej «Chryścijanskaja vizija» pisała pra zahadkavuju kaplicu biez kryžoŭ u vioscy Kivačyna Pružanskaha rajona, jakuju nazyvajuć «carkvoj Zajcava». Choć budynak źniešnie bolš nahadvaje pravasłaŭny chram, nasamreč jon pryznačany dla Rymska-katalickaj carkvy. Praŭda, praz hod paśla zakančeńnia budaŭnictva kaplica pa-raniejšamu zastajecca zakrytaj i nieaśviečanaj.

Tym časam u samich Pružanach pa inicyjatyvie i za srodki Zajcava płanujecca budaŭnictva novaha kaścioła. U horadzie ŭžo jość katalicki chram, a miascovaja katalickaja supolnaść nievialikaja. Tamu, jak adznačaje «Chryścijanskaja vizija», vidavočnaj nieabchodnaści ŭ druhim kaściole niama. Adnak pytańnie ab budaŭnictvie, vierahodna, było vyrašanaje jašče jak minimum hod tamu: užo tady isnavaŭ prajekt i była vyznačanaja suma, jakaja pieravyšaje miljon dalaraŭ.

«Chryścijanskaja vizija» znajšła paćviardžeńnie isnavańnia prajekta i apisańnie budučaha abjekta. Aficyjna jon budzie nazyvacca «katalicki duchoŭny kompleks «Kaplica Śviatoha Archanhieła Michaiła», choć pavodle vyhladu nahadvaje paŭnavartasny kaścioł.

Zakazčykam kompleksu paznačanaja miascovaja rymska-katalickaja parafija Uśpieńnia Najśviaciejšaj Panny Maryi, jakoj naležyć užo najaŭny stary chram. Pry hetym, jak miarkuje «Chryścijanskaja vizija», nievialikaja parafija nie maje i nie moža mieć dastatkovych srodkaŭ dla budaŭnictva takoha abjekta.

Dla prajekta vydzieleny ŭčastak płoščaj 1,66 hiektara. Na im płanujecca raźmiaścić nie tolki duchoŭny kompleks u nieahatyčnym styli, ale taksama parafijalny dom, «Hiefsimanski sad», parafijalny centr i piešachodnyja dy prahułačnyja darožki.

Infarmacyju pra heta «Chryścijanskaja vizija» atrymała z materyjałaŭ hramadskaha abmierkavańnia prajekta, jakoje Pružanski rajvykankam pravodziŭ u krasaviku 2026 hoda. Pradstaŭnikom zakazčyka tady było paznačana minskaje tavarystva z abmiežavanaj adkaznaściu «ZA STROJ», a raspracoŭščykam architekturna-płanirovačnaj kancepcyi — AAT «Brestprajekt».

Mahčymyja matyvy Zajcava źviazvajuć z padziejami piacihadovaj daŭniny. U 2021 hodzie ŭ susiednich Ružanach źjaviłasia vielmi darahaja ikona śviatoj Varvary. Aficyjna paviedamlałasia, što jaje na zamovu nienazvanaha miecenata stvaryŭ viadomy brescki juvielir Mikałaj Kuźmič, aŭtar kopii kryža Jeŭfrasińni Połackaj. Toj ža miecenat, jak paviedamlałasia, apłaciŭ ramont chrama.

Na fotazdymkach, raźmieščanych na parafijalnaj staroncy, možna ŭbačyć, jak miarkuje «Chryścijanskaja vizija», samoha miecenata. Mužčyna byŭ u mascy, bo ŭ toj čas praciahvałasia pandemija karanavirusa, ale na adnym sa zdymkaŭ u im možna paznać Alaksandra Zajcava.

U 2025 hodzie Mikałaj Kuźmič paviedamiŭ, što stvaraje sieryju z 12‑ci ŭnikalnych abrazoŭ. Pieršaj u hetaj sieryi stała ikona śviatoj Varvary. Pavodle źviestak «Chryścijanskaj vizii», kožnaja z takich ikon kaštuje sotni tysiač dalaraŭ. Dla ich vyrabu vykarystoŭvajucca zołata, srebra, kaštoŭnyja i paŭkaštoŭnyja kamiani, a taksama technika pieraharodkavaj emali, u tym liku staražytnaj vizantyjskaj emali.

Viasnoj 2026 hoda juvielir skončyŭ čarhovuju ikonu ź sieryi — śviatoj Kaciaryny. Pavodle arhanizacyi, usie 12 abrazoŭ zamoviŭ i apłaciŭ Alaksandr Zajcaŭ, i mienavita jon źjaŭlajecca ich uładalnikam. U chramy tvory pieradajucca tolki na zachoŭvańnie, što afarmlajecca adpaviednymi dakumientami.

«Chryścijanskaja vizija» źviartaje ŭvahu na toje, što ŭ sieryi jość taksama vyjava śviatoha Archanhieła Michaiła. Arhanizacyja miarkuje, što hetaja ikona moža być raźmieščanaja ŭ novym duchoŭnym kompleksie ŭ Pružanach, jaki stanie hałoŭnym relihijnym prajektam Zajcava.

Aŭtary materyjału taksama razvažajuć pra simvoliku ličby 12. Jana maje značeńnie ŭ chryścijanstvie, a ŭ ezaterycy i akultyźmie moža suadnosicca z dvanaccaćciu znakami zadyjaka. Ličba 12 vykarystoŭvajecca i ŭ niekatorych stupieniach dy rytuałach masonstva.

Paćvierdžanych źviestak pra toje, što sam Zajcaŭ zajmajecca ezaterykaj, niama. Adnak jahonaja žonka nie chavaje cikavaści da takich praktyk i nazyvaje siabie viedźmaj. Akramia taho, siabar biznesmiena Aleh Arłoŭ adkryta raspaviadaŭ, što zajmaŭsia akultyzmam.

Na dumku «Chryścijanskaj vizii», ličba 12 moža mieć dla Zajcava asablivaje, mahičnaje značeńnie i ŭsprymacca jak sakralnaja abarona peŭnaj terytoryi i jaje resursaŭ — ludziej, lesu i tych, chto hetym lesam rasparadžajecca.

Inicyjatyva źviazvaje hetuju mahčymuju simvoliku ź vielmi łakalnaj prastoraj: Pružanami, Ružanami, Biełaviežskaj puščaj i biełaruskim Paleśsiem. Heta terytoryi, jakija možna razhladać jak małuju radzimu i zonu ŭpłyvu biznesmiena.

U sieryi ikon jość taksama vobrazy Maci Božaj — Uładarki lasoŭ — i śviatoha Hubierta, apiekuna palaŭničych. Pavodle aŭtaraŭ rasśledavańnia, hetyja vyjavy ŭtvarajuć svojeasablivuju paru: les jak śviatynia i palaŭničy abo laśnik jak jaho adkazny zachavalnik. Ikona śviatoj Varvary, u svaju čarhu, moža simvalizavać abaronu čałaviečaha žyćcia i rehijona ad biedstvaŭ.

«Chryścijanskaja vizija» miarkuje, što Zajcaŭ choča raźmiaścić usie 12 ikon u roznych chramach — pa adnoj u kožnym — na terytoryi Pružanskaha rajona.

Adnak ciapier u rajonie naličvajecca tolki dziesiać katalickich kaściołaŭ i kaplic, pryčym niekatoryja ź ich vyhladajuć jak zvyčajnyja viaskovyja chaty.

Tamu aŭtary vykazvajuć zdahadku, što biznesmien moža płanavać budaŭnictva jašče niekalkich chramaŭ, kab ich ahulnaja kolkaść u rajonie dasiahnuła dvanaccaci. Hałoŭnym ź ich stanie duchoŭny kompleks u Pružanach. Kaplica ŭ Kivačynie, vierahodna, mahła być pabudavanaja dla raźmiaščeńnia adnoj ź ikon. Nie vyklučana, što padobnyja kaplicy mohuć źjavicca i ŭ inšych vioskach Pružanskaha rajona.

Pavodle infarmacyi «Chryścijanskaj vizii», pradstaŭniki duchavienstva jeparchii nie padtrymlivajuć budaŭnictva novaha kaścioła ŭ Pružanach i nazyvajuć Zajcava «psieŭdamiecenatam». Jany tłumačać, što pry sapraŭdy bieskaryślivych namierach biznesmien moh by dapamahać miascovaj carkvie tam, dzie takaja dapamoha najbolš patrebnaja. U jakaści prykładu nazyvajecca budaŭnictva kaścioła ŭ Breście, dzie, pa słovach duchavienstva, isnuje vostraja nieabchodnaść u novym chramie.

Adnak Zajcaŭ, jak śćviardžajecca, vybiraje inšy šlach: układaje značnyja srodki va ŭłasnyja prajekty, buduje chramy i apłačvaje darahija ikony, jakija stvarajucca ŭ adpaviednaści ź jahonymi asabistymi zadumami.

Kamientary da artykuła