Ceny na kvatery ŭ «Minsk-Śviecie» padajuć, a ŭ Minsku — rastuć. Sumnyja pierśpiektyvy dla rajona?
Na rynku staličnaj nieruchomaści nazirajecca anamalija.
«Minsk-Śviet». Fota: zabudoŭščyka
Horad u horadzie
Siaredni košt mietra ŭ stalicy praciahvaje raści. Pavodle danych Realt.by, pa stanie na 20 vieraśnia mietr u Minsku pa prapanovach kaštuje $2525.
Pry hetym nazirajecca cikavaja tendencyja — ceny na kvatery ŭ «Minsk-Śviecie», naadvarot, padajuć na praciahu ŭsiaho vieraśnia. Tolki za apošni tydzień kvadrat pa prapanovach tam patańnieŭ na 3,2%.
U toj čas, jak ahułam pa Minsku za hety pieryjad ceny ŭ abjavach padraśli na 1,5%.
Paralelna z tym, jak kvadrat u «Minsk-Śviecie» pačaŭ tańnieć, raście kolkaść prapanoŭ u hetym rajonie. Za karotki čas kvater u prodažy pabolšała na tracinu.
Čamu tak adbyvajecca i čaho čakać dalej?
Hałoŭnaj pryčynaj, čamu ceny ŭ hetym mikrarajonie pačali prasiadać, sapraŭdy moža być pavieličeńnie prapanoŭ paśla zdačy ŭ ekspłuatacyju čarhovych budynkaŭ.
Kali kolkaść achvotnych nabyć tam žytło zastajecca stabilnaj, a kolkaść achvotnych pradać kvateru raście, to pa zakonie popytu i prapanovy ceny musiać iści ŭniz, bo pradaŭcam davodzicca zmahacca za pakupnika.
Ilustracyjny zdymak. Fota zabudoŭščyka
Z ulikam taho, što «Minsk-Śviet» usio jašče praciahvaje zabudoŭvacca, choć i padychodzić da zaviaršeńnia, tendencyja sa źnižeńniem cen moža mieć praciah.
Mnohija kuplali i praciahvajuć nabyvać kvatery ŭ «Minsk-Śviecie» jak inviestycyju, a nie jak žytło, kudy płanujuć pierajechać sami. Na fonie taho, jak kvadrat u Minsku ciaham apošnich hadoŭ daražeŭ, abnaŭlajučy rekordy, kupla kvatery na etapie budaŭnictva jak inviestycyja sapraŭdy źjaŭlajecca vyhadnaj zadumaj.
Adnak u vypadku z «Minsk-Śvietam» kolkaść patencyjnych inviestycyjnych kvater u rajonie vialikaja. I ŭličvajučy, što ceny ciapier na piku, mnohija mohuć pačać śpiašacca pradać kvateru pa vysokim košcie, što taksama ŭpłyvaje na kolkaść prapanoŭ.
Asobna možna vyłučyć pieraprodaž biznes-apartamientaŭ — žytła novaha dla Biełarusi jurydyčnaha farmatu, jakoje pa fakcie źjaŭlajecca zvyčajnymi kvaterami z samym tannym mietram, ale ź niuansami, da jakich mnohija byli nie hatovyja. Siarod ich — bolš vysokaja kamunałka, čym u zvyčajnych kvaterach, a taksama składanaści z uźviadzieńniem ścien i inšych źmien, da jakich pieršasnyja pakupniki byli nie hatovyja.
Heta taksama mahło stać dadatkovym stymułam da taho, kab vystavić kvateru (biznes-apartamienty) na prodaž. Padrabiaźniej pra takoj farmat nieruchomaści «Naša Niva» pisała raniej.