U Jeŭrasajuzie damovilisia razmarozić 6,6 miljarda jeŭra dla Ukrainy

Krainy Jeŭrasajuza damovilisia razbłakavać prahramu vajskovaj dapamohi Ukrainie na 6,6 miljarda jeŭra. Hetyja srodki byli zamarožanyja ź viasny 2023 hoda paśla taho, jak Vienhryja nakłała vieta na vykarystańnie Jeŭrapiejskaha fondu miru dla kampiensacyi krainam ES koštu zbroi i bojeprypasaŭ, jakija jany pieradavali Ukrainie, piša Euronews.

Kaja Kałas. Fota: Mostafa Darwish/Anadolu via Getty Images

Palityčnaje pahadnieńnie było dasiahnuta 25 vieraśnia na pasiadžeńni Kamiteta pa palitycy i biaśpiecy ES u Brusieli. Viarchoŭnaja pradstaŭnica ES pa zamiežnaj palitycy Kaja Kałas nazvała heta dobraj navinoj dla Ukrainy i zajaviła, što Jeŭropa nie źbirajecca skaračać padtrymku Kijeva.

Jeŭrapiejski fond miru byŭ stvorany dla častkovaj kampiensacyi krainam ES vydatkaŭ na vajskovuju dapamohu Ukrainie. U pieršyja hady vajny jon byŭ adnym z asnoŭnych miechanizmaŭ jeŭrapiejskaj padtrymki, ale ŭ mai 2023 hoda Vienhryja zabłakavała dalejšaje vykarystańnie srodkaŭ.

Pieraadoleć hetuju błakiroŭku atrymałasia tolki ŭ 2026 hodzie. Paśla parłamienckich vybaraŭ u Vienhryi ŭ krasaviku i prychodu da ŭłady novaha premjer-ministra Pietera Madźjara krainy ES pačali pieramovy ab umovach razmarožvańnia srodkaŭ.

Pa słovach Kałas, pakiet u 6,6 miljarda jeŭra padzieleny na try častki. 4,7 miljarda jeŭra pryznačanyja dla kampiensacyi krainam vydatkaŭ na ŭžo pieradadzienuju zbroju, 1 miljard — na sumiesnyja zakupki vajskovaj techniki, jašče 900 miljonaŭ — na misiju ES pa padrychtoŭcy ŭkrainskich vajskoŭcaŭ. Niekatoryja krainy płanujuć nakiravać svaju častku srodkaŭ ź pieršaha pakieta niepasredna Ukrainie.

Adnak dla faktyčnaha pieraličeńnia hrošaj jašče nieabchodna pryniać niekalki adpaviednych pravavych aktaŭ.

Rašeńnie pryniata ŭ składany dla Ukrainy momant. Biudžetu jaje Ministerstva abarony nie chapaje kala 27 miljardaŭ dalaraŭ, abo 23,67 miljarda jeŭra. Jeŭrakamisija i Mižnarodny valutny fond abmiarkoŭvajuć z ukrainskim uradam mahčymyja šlachi vyrašeńnia prablemy.

Prezident Ukrainy Uładzimir Zialenski zajaviŭ, što pytańnie z deficytam nieabchodna vyrašyć užo ŭ kastryčniku—listapadzie, kab zabiaśpiečyć apłatu pastavak bieśpiłotnikaŭ, zapłanavanych na pieršyja try miesiacy 2027 hoda. Pavodle jaho słoŭ, značnaja častka deficytu źviazanaja mienavita ź finansavańniem vytvorčaści ŭzbrajeńniaŭ, u tym liku bieśpiłotnikaŭ i rakiet.

Kamientary da artykuła