U Čačersku nie traciać nadziei zbyć z ruk staradaŭniuju siadzibu

U Čačersku čarhovy raz vystavili na aŭkcyjon zakansiervavanuju siadzibu płoščaj 1129 kvadratnych mietraŭ. U XIX stahodździ jana naležała hrafu Zacharu Čarnyšovu-Kruhlikavu, piša Office Life.

Fota: BUTB-Majomaść

Siadzibu ŭžo sprabavali, prytym nie pieršy raz, pradać u červieni, ale kupcoŭ tady nie znajšłosia. Ciapier jaje znoŭ prapanujuć za adnu bazavuju vieličyniu — 45 rubloŭ. Takim ža zastajecca i pamier zadatku. Krok aŭkcyjonu składaje 2,25 rubla. Torhi pryznačanyja na 28 vieraśnia, ale pa stanie na viečar 25 vieraśnia zajavak nie było.

Razam z budynkam H-padobnaj formy novy ŭładalnik atrymaje i šerah abaviazkaŭ. Jon pavinien budzie padpisać achoŭnaje abaviazacielstva, całkam adrestaŭravać histaryčna-kulturnuju kaštoŭnaść na praciahu dvuch hadoŭ, a paśla jašče jak minimum dva hady vieści ŭ siadzibie haspadarčuju dziejnaść.

Inviestara dla abjekta sprabujuć znajści ŭžo bolš za try hady. Uviesnu 2023 hoda siadzibu ŭpieršyniu vystavili na biržavyja tarhi za 859 tysiač rubloŭ. Praź niekalki miesiacaŭ košt źnizili da 429 tysiač rubloŭ, a da leta 2025 hoda jon upaŭ da adnoj bazavaj vieličyni.

Ziamli ŭ Čačersku Zacharu Čarnyšovu ŭ 1774 hodzie asabista padaravała rasijskaja impieratryca Kaciaryna II. Kamienny pałacavy dom budavali pastupova i zaviaršyli ŭ 1860 hodzie.

Za svaju historyju siadziba vykarystoŭvałasia nie tolki jak žyłyja pamiaškańni. Tut pracavali ziemskaja škoła, dziciačaja biblijateka i Dom pijanieraŭ. Padčas vajny niemcy prystasavali budynak pad stajniu. Na bałansie adździeła kultury Čačerskaha rajvykankama siadziba znachodzicca z 2002 hoda.

Kamientary da artykuła