«Špijon u kišeni»: rasijski miesiendžar Max sočyć za karystalnikami i dapamahaje błakavać VPN

InterSecLab razam z RKS Global zmahli zazirnuć «pad kapot» prahramy i daviedalisia, jak jana sočyć za karystalnikami. My vyvučyli daśledavańnie i tłumačym, čamu MAX staŭ srodkam tatalnaha kantrolu i čym jon niebiaśpiečny.

Ilustratyŭnaja vyjava, zhienieravanaja Gemini

Mižnarodnaja daśledčaja łabaratoryja InterSecLab u supracoŭnictvie z analityčnym centram RKS Global apublikavała vyniki vyvučeńnia rasijskaha miesiendžara Max.

Ź vieraśnia 2025 hoda rasijskija ŭłady zrabili miesiendžar Max, raspracavany kampanijaj VK, abaviazkovym dla ŭsich smartfonaŭ i płanšetaŭ, jakija pradajucca ŭ Rasii. Paralelna pierakryvaŭsia dostup da niezaležnych srodkaŭ suviazi: miesiendžar Signal zabłakavali ŭ žniŭni 2024 hoda, WhatsApp — u lutym 2026-ha, a z sakavika 2026 hoda pačalisia masavyja błakavańni Telegram.

Siońnia Max prymusova ŭkaraniajecca dla atrymańnia dziaržaŭnych pasłuh jak u Rasii, tak i na akupavanych terytoryjach Ukrainy — až da zapisu dziaciej u škołu ci zapisu da doktara. U suviazi z hetym jon nabiraje papularnaść i siarod biełarusaŭ — dla pracy ci suviazi sa svajakami ŭ Rasii.

Interfiejs Max-a amal całkam kapijuje Telegram, ale za im chavajecca instrumient sačeńnia rasijskich śpiecsłužbaŭ.

Jak ekśpierty prabilisia ŭ «zakrytuju sistemu» Max

Raspracoŭščyki Max imknulisia maksimalna abaranić dadatak ad vonkavaha analizu. Jon vykarystoŭvaje zakryty pratakoł z rasijskaj fiederalnaj kryptahrafijaj ad pastaŭščyka, licenzavanaha FSB, zachoŭvaje adrasy ŭ zašyfravanym vyhladzie i adrazu zaviaršaje pracu pry vyjaŭleńni instrumientaŭ daśledavańnia.

Kab abyści hetyja barjery, daśledčyki pravodzili vyvučeńnie na Android-viersii 26.12.0 (zborka 6664) u pieryjad z sakavika pa maj 2026 hoda. Jany stvaryli admysłovy miechanizm, jaki zachaplaŭ źmieściva paviedamleńniaŭ i zapytaŭ unutry prahramy ŭ momant pierad jaho zašyfravańniem — naŭprost u apieratyŭnaj pamiaci smartfona.

Nijakaj tajamnicy pierapiski ŭ Max: poŭnaja adsutnaść skraznoha šyfravańnia

U biaśpiečnych miesiendžarach vykarystoŭvajecca skraznoje šyfravańnie (End-to-End Encryption) — kluč ad pierapiski jość tolki ŭ adpraŭnika i atrymalnika, a sierviery bačać tolki zašyfravany nabor simvałaŭ.

U Max skraznoha šyfravańnia niama ŭvohule. Usie paviedamleńni pieradajucca i zachoŭvajucca na siervierach VK u adkrytym vyhladzie. Kožnaje tekstavaje paviedamleńnie paznačajecca ściažkami dla pravierki siervieram na spasyłki, hałasavyja paviedamleńni rasšyfroŭvajucca na siervierach VK, a padčas zvankoŭ razmova prapuskajecca praz modul analizu hołasu na telefonie, jaki VK moža dystancyjna padmianiać sa svajho sierviera.

U Max možna sačyć za ŭsimi — za kožnym asobna

Ekśpierty nazyvajuć heta kiravańniem funkcyjami ź sierviera dla kožnaha akaŭnta (per-account controls) i ličać hałoŭnym adkryćciom daśledavańnia.

Zvyčajna, kab u prahramie źjaviłasia novaja funkcyja ci źmianilisia nałady, karystalnik spampoŭvaje abnaŭleńnie. U Max siervier VK moža dystancyjna ŭklučyć ci vyklučyć lubyja mahčymaści ci špijonskija funkcyi (zandavańnie sietki, vyjaŭleńnie VPN, rasšyfroŭku hołasu, pašyranaje łahavańnie) dla adnaho karystalnika albo hrupy ludziej biez anijakich paviedamleńniaŭ u interfiejsie.

U vyniku dvoje ludziej z adnolkavaj viersijaj Max mohuć karystacca faktyčna roznymi prahramami i navat nie zdahadvacca pra heta.

Smartfon Max jak zond dla patreb cenzaraŭ

Max sistematyčna źbiraje poŭnuju spravazdaču pra sietkavaje asiarodździe: pry adkryćci ci pierachodzie ŭ fonavy režym jon zapytvaje źniešni IP-adras, identyfikuje mabilnaha apieratara, praviaraje najaŭnaść VPN i dastupnaść šerahu resursaŭ, u tym liku rasijskaha partała dziaržpasłuh.

Bolš za toje, u prahramie znajšli skryty kanał zandavańnia (network probing):

1. Siervier VK adpraŭlaje na telefon zašyfravany śpis internet-adrasoŭ.
2. Prahrama pačynaje samastojna i biasšumna «prastukvać» kožny adras z atrymanaha śpisu z pryłady karystalnika.
3. Vyniki adsyłajucca na siervier trace-flow.ru u sietcy VK. Padčas testaŭ kanał zapuskaŭsia 19 razoŭ, a siarod adrasoŭ byŭ servis push-apaviaščeńniaŭ Apple, jakoha navat nie było ŭ pačatkovym kodzie prahramy.

Heta aznačaje, što rasijskija cenzary vykarystoŭvajuć miljony telefonaŭ zvyčajnych ludziej jak schavanych «raźviedčykaŭ», kab u realnym časie bačyć, jaki niezaležny sajt ci VPN-servis pracuje ŭ roznych apierataraŭ i ŭ roznych rehijonach, i chutčej jaho začyniać.

Max: błakavańnie VPN, sačeńnie pa numary i źliŭ adrasnaj knihi

• Pry vyjaŭleńni VPN na pryładzie Max adrazu spyniaje pracu i patrabuje adklučyć abaronienaje złučeńnie, staviačy karystalnika pierad prymusovym vybaram pamiž instrumientam abychodu cenzury i prahramaj dla dziaržpasłuh.
• Pry rehistracyi Max zahružaje na sierviery VK usiu adrasnuju knihu (imiony i numary) u adkrytym vyhladzie.
• Luby karystalnik moža zapytać infarmacyju pa čužym numary telefona, paśla čaho sierviery VK pačynajuć tranślavać status znachodžańnia ŭ sietcy ŭ realnym časie bolš za 15 chvilin biez apaviaščeńnia achviary.

Jak minimizavać ryzyki, kali Max nieabchodny

Ekśpierty padkreślivajuć, što Max nielha vykarystoŭvać dla pryvatnaj ci adčuvalnaj pierapiski. Kali prahrama patrebnaja dla dziaržpasłuh u Rasii ci suviazi sa svajakami, jany rajać prytrymlivacca nastupnych pravił:

1. Izalacyja prahramy: Staŭcie Max u asobny pracoŭny profil Android albo vykarystoŭvajcie dla jaho asobny «čysty» smartfon.
2. VPN na roŭtary: Max šukaje VPN mienavita na smartfonie. Kali VPN nastrojeny na chatnim roŭtary, prahrama jaho nie bačyć i nie błakuje.

Kamientary da artykuła