Miesiendžar Max staŭ samym papularnym u Biełarusi? Łuchta, i voś čamu
Miesiendžar Max, stvorany pa zahadzie rasijskich uład kampanijaj VK Group, vyjšaŭ u trendy Google Play u Rasii, Biełarusi i ŭ inšych krainach ź vialikaj dolaj ruskamoŭnaha nasielnictva. Ale z vodhukami i adznakami nie ŭsio tak prosta.
Nakrutka dla Biełarusi i inšych krain pačałasia 12 žniŭnia, u top prahrama vyjšła 14 žniŭnia i dahetul tam zastajecca. U Rasii jaho nakrucili ŭ top jašče raniej, u lipieni.
Nasamreč, heta kaža tolki pra toje, što Rasija ŭkłała vielizarnyja hrošy ŭ raskrutku miesiendžara i imitacyju jaho papularnaści. Voś jak ros rejtynh prahramy ŭ Biełarusi — jana padniałasia za sutki z kanca rejtynha na 3-je miesca, a praź dzień vyjšła na pieršaje. Za 3 dni Max padniaŭsia na bolš, čym 70 pazicyj.
Isnuje inšy pakazčyk — Usage rank, rejtynh vykarystańnia. Z dapamohaj roznych instrumientaŭ servis SimilarWeb vymiaraje toje, kolki času pravodzić čałaviek u prahramie. Tut u miesiendžara pakazčyki vielmi ścipłyja — navat u Rasii jon na 34 miescy siarod usich prahram.
Pa źviestkach taho ž SimilarWeb, u Rasii biezumoŭnym lidaram dahetul zastajecca Telegram. Statystyka pa Biełarusi niedastupnaja biaspłatna, ale pakazčyki buduć supastaŭnyja.
Rejtynh u kramie Google Play — heta nie vielmi relevantny pakazčyk. Chacia b tamu, što jaho možna nakrucić. Robicca heta praź niekalki šlachoŭ, ale najpierš — z dapamohaj zakupki matyvavanaha trafiku. Isnujuć servisy, dzie ŭ štacie pracujuć sotni ludziej, jakija zajmajucca tym, što imitujuć karystańnie prahramaj, pakidajuć na jaje vodhuki i padymajuć joj rejtynh i papularnaść.
Taksama vykarystany vielizarny administratyŭny resurs. Dziaržsłužačych zmušajuć pierachodzić u Max. Jon budzie prymusova ŭbudavany va ŭsie smartfony, jakija pradajucca ŭ Rasii, z 1 vieraśnia. Zmušajuć jaho spampoŭvać i studentaŭ i školnikaŭ, vučebnuju kamunikacyju jakich prymusova pieraviali ŭ hety miesiendžar.
Rekłamujuć Max i rasijskija zorki — błohiery i śpievaki, a Jahor Kryd navat intehravaŭ rekłamu ŭ svoj novy klip. Absurdnaść farmulovak užo stała miemam — zorki śćviardžajuć, što jon łović «na parkoŭcy», «u lifcie» i navat «u mory».
Toje, što rejtynh nakručany, dakazać niaciažka. Pahladzicie, naprykład, na dynamiku vodhukaŭ na Google Play. Spačatku ich było zusim niašmat, ale z 20-ch čysłaŭ žniŭnia ichniaja kolkaść prosta niejmaviernaja, bolš, čym u Telegram, u jakim zarehistravanyja ŭ dziasiatki razoŭ bolš ludziej z usiaho śvietu.
Možna źviarnuć uvahu i na adznaki. Z 26 pa 31 žniŭnia pakinuli bolš za 90 tysiač vodhukaŭ na miesiendžar Max i tolki 19 tysiač na našmat papularniejšy Telegram.
Značnaja častka pazityŭnych vodhukaŭ vidavočna nakručanaja. U ich ludzi chvalać prahramu adnatypnymi frazami.
Ale značnaja častka vodhukaŭ vielmi niehatyŭnaja. Ludzi skardziacca na drennuju suviaź, niazručnaść, niemahčymaść rehistracyi, prablemy z funkcyjanałam. Bolšaść takich vodhukaŭ vyhladajuć jak sapraŭdnyja.
Značnaja častka karystalnikaŭ taksama pieražyvaje za toje, što prahrama moža źbirać ichnija źviestki. Časta vykarystoŭvajecca słovazłučeńnie «špijonskaja prahrama».
Padobna, što žycharoŭ Rasii ŭ vyniku zmusiać karystacca miesiendžaram dla niejkich patrebaŭ, ale jon nie zdoleje pierabić kankurentaŭ. Sproba zamianić YouTube na RuTube ci VK Videa skončyłasia pravałam, niahledziačy na vielizarnyja hrošy, jakija byli ŭkładzienyja ŭ prajekty. Vyhladaje tak, što miesiendžar Max čakaje toj ža los.
«Naša Niva» — bastyjon biełaruščyny
PADTRYMAĆ
Kamientary