Žanočuju zbornuju Biełarusi pa handbole aficyjna zaprasili na Kubak nacyj. Heta ŭpieršyniu za piać hadoŭ

Žanočaja zbornaja Biełarusi pa handbole atrymała aficyjnaje zaprašeńnie ad Mižnarodnaj fiederacyi handboła (IHF) na ŭdzieł u turniry IHF Nations Trophy, viadomym taksama jak Kubak nacyj. Spabornictvy projduć u bałharskim Kranievie z 25 da 29 listapada. Adpaviednaje paviedamleńnie ad IHF pastupiła ŭ Biełaruskuju fiederacyju handboła 27 vieraśnia.

Fota ilustracyjnaje

Dla biełaruskaj zbornaj heta budzie pieršy aficyjny turnir pad ehidaj IHF z 2021 hoda. Pieršy vučebna-trenirovačny zbor pad kiraŭnictvam Ihara Papruhi zapłanavany na 12—25 kastryčnika. Jašče adzin zbor kamanda praviadzie niepasredna pierad vyjezdam u Bałharyju.

Raniej IHF pryniała rašeńnie źniać abmiežavańni na ŭdzieł biełaruskich kamandaŭ u mižnarodnych spabornictvach.

Apošni na siońnia aficyjny matč žanočaja zbornaja Biełarusi ŭ turnirach pad ehidaj IHF praviała ŭ krasaviku 2021 hoda. Tady biełaruski ŭ druhim raŭndzie jeŭrapiejskaj kvalifikacyi zmahalisia za vychad na čempijanat śvietu. Pa vynikach dvuch matčaŭ jany sastupili zbornaj Čarnahoryi i nie prajšli ŭ finalnuju častku suśvietnaha pieršynstva. Paśla taho ž za saŭdzieł režymu Łukašenki ŭ rasijskim napadzie na Ukrainu ŭ lutym 2022 hoda biełaruskaja zbornaja, jak i bolšaść inšych spartyŭnych kamandaŭ ź Biełarusi i Rasii, była adchilenaja ad mižnarodnych spabornictvaŭ.

U kastryčniku 2026 hoda na čempijanacie śvietu ŭ Maroka pad ehidaj IHF taksama debiutuje žanočaja zbornaja Biełarusi va ŭzroście da 16 hadoŭ.

Kamientary da artykuła