BiełAZ vypraboŭvaje samazvał z aŭtanomnym kiravańniem. Sam jon pad Łunincam, a kirujuć im ź Minska

Pracu mašyny 1 kastryčnika pakazali na palihonie «Sitnickaje» ŭ Łuninieckim rajonie. 

Fota: BiełTA

Na Brestčynie vypraboŭvajuć aŭtanomny samaskid BiełAZ-7558R, jakim možna kiravać dystancyjna ź Minska. Na pramysłovaj vystavie «Innapram. Biełaruś» u Minsku pakazali pracoŭnaje miesca apieratara dla dystancyjnaha kiravańnia karjernaj technikaj. Śpiecyjalist niepasredna sa stenda moh kiravać 90‑tonnym rabatyzavanym samaskidam, jaki znachodziŭsia za sotni kiłamietraŭ na vyprabavalnym palihonie.

Fota: BiełTA

Pa słovach namieśnika hienieralnaha kanstruktara ličbavizacyi karjernaj techniki Dźmitryja Jelisiejeva, zakazčyki aktyŭna cikaviacca mašynami, zdolnymi pracavać aŭtanomna. BiełAZ viadzie pieramovy ź niekalkimi bujnymi zakazčykami, jakim płanujecca pastaŭlać samazvały z aŭtanomnym kiravańniem. Pahladzieć na techniku ŭ Łuniniecki rajon pryjechali kala 50 pradstaŭnikoŭ patencyjnych klijentaŭ.

Hienieralny dyrektar BiełAZa Siarhiej Lesin adznačyŭ, što ciapier hałoŭnaja zadača — vyprabavać novuju technałohiju va ŭmovach realnaj pracy, piša BiełTA.

Aŭtanomny samaskid vykarystoŭvaje kampjutarny zrok i niejrasietkavyja ałharytmy. Jany dazvalajuć mašynie raspaznavać pieraškody, prahnazavać ruch i samastojna prymać rašeńni. Sistema dyśpietčaryzacyi dazvalaje adnamu apierataru adnačasova kantralavać pracu piaci takich mašyn.

Miarkujecca, što technałohija dapamoža vyrašać prablemu niastačy kiroŭcaŭ, bolš efiektyŭna vykarystoŭvać karjernuju techniku i zabiaśpiečvać rytmičnaść jaje pracy.

U aŭtanomnym režymie samazvał samastojna vykonvaje ŭvieś pracoŭny cykł — ad zahruzki da razhruzki i viartańnia da miesca zahruzki. Mašyna buduje i karektuje maršruty, kantraluje ślapyja zony i zony biaśpieki, a taksama adsočvaje prysutnaść ludziej pobač z technikaj.

Kamientary da artykuła