Biełaruski aŭtamabilny zavod u Žodzinie ŭ 2027 hodzie płanuje vyrabić 220‑tonny karjerny samazvał, jaki budzie pracavać na vadarodnym palivie. Pra heta 15 vieraśnia paviedamiŭ hienieralny kanstruktar pradpryjemstva Alaksandr Naskaviec, piša primepress.by.
Pavodle słoŭ Alaksandra Naskaŭca, na BiełAZie ŭžo stvaryli 130‑tonny samazvał na vadarodnym palivie. Ciapier zakančvajucca jaho vyprabavańni, paśla čaho mašynu płanujuć adpravić na adno z pradpryjemstvaŭ Rasii. Što da 220‑tonnaj madeli, to na joj zakančvajucca pieradprajektnyja raboty i pačynajecca raspracoŭka dakumientacyi. U lutym 2027 hoda samaskid płanujuć ubačyć u mietale.
Siarod apošnich raspracovak pradpryjemstva taksama technika dla padziemnych rabot u šachtach. BiełAZ sumiesna i na zamovu rasijskaj kampanii «Narnikiel» vyrabiŭ 45‑tonny samaskid i 17‑tonnuju pahruzačna-dastaŭnuju mašynu. Čakajecca, što praź niekalki miesiacaŭ hetaja technika pačnie pracavać u šachcie.
Na pramysłovym palihonie ŭ Bresckaj vobłaści zavieršany poŭny cykł vyprabavańniaŭ rabatyzavanych samazvałaŭ. Jany prajšli paśpiachova. Ciapier viaducca pieramovy ab pastaŭkach techniki ŭ Rasiju. Dla jaje supravadžeńnia ŭ miescach ekspłuatacyi BiełAZ stvaryŭ sumiesnaje pradpryjemstva z rasijskaj karparacyjaj «Rastech».
Biełaruski aŭtamabilny zavod byŭ zasnavany ŭ 1948 hodzie, a ŭ kancy 2009 hoda akcyjanavany. Usie 100% jaho akcyj naležać dziaržavie. Pradpryjemstva vypuskaje bolš za 200 madyfikacyj samazvałaŭ hruzapadymalnaściu ad 30 da 450 ton, a taksama śpiecyjalizavanuju techniku.
Ciapier čytajuć
Masavyja aryšty aficeraŭ prajšli na avijabazie ŭ Mačuliščach — abvinavačvajuć u suviaziach z apazicyjaj40
Masavyja aryšty aficeraŭ prajšli na avijabazie ŭ Mačuliščach — abvinavačvajuć u suviaziach z apazicyjaj
Julijana Šamietaviec z «Kibierpartyzanaŭ» stała maci — raskazvaje pra dekretny adpačynak u ZŠA i toje, ci sapraŭdy možna sumiaščać pracu z maciarynstvam1818
Kamientary