Nakolki adzinokija jeŭrapiejcy? U Hiermanii ŭžo 43% chatnich haspadarak składajucca z adnaho čałavieka

Žyć adnamu ŭsio čaściej stanovicca nie vymušanaj situacyjaj, a śviadomym vybaram. Ludzi ceniać mahčymaść samastojna rasparadžacca svaim žyćciom, niezaležnaść i spakoj. Novaje daśledavańnie pakazała, nakolki maštabnaj stała hetaja źjava ŭ raźvitych krainach i da čaho rychtavacca biznesu.

Dla mnohich ludziej adzinota — uśviadomleny vybar. Zdymak ilustracyjny. Fota: Aliaksandr Barysenka / Vecteezy

Ujaŭleńnie pra toje, jak pavinna vyhladać darosłaje žyćcio, pastupova mianiajecca. Šlub, sumiesnaje žyllo i stvareńnie siamji ŭžo nie dla ŭsich vyhladajuć abaviazkovymi etapami. Usio bolš ludziej addajuć pieravahu žyćciu, u jakim nie treba ŭzhadniać ź inšymi svaje płany, byt i štodzionnyja rašeńni.

Nakolki maštabnaj stała hetaja źmiena, pakazvaje daśledavańnie kansałtynhavaj kampanii BCG. Analityki apytali bolš za 13 tysiač žycharoŭ 12 raźvitych ekanomik śvietu, u tym liku Francyi, Hiermanii, Italii, Šviecyi, Vialikabrytanii, ZŠA, Kitaja i Japonii. Vybarki ŭ kožnaj krainie byli reprezientatyŭnymi i adpaviadali jaje demahrafičnaj struktury.

Udzielnikaŭ pytalisia pra ich ład žyćcia i spažyvieckija pavodziny ŭ roznych śfierach — ad ježy i adzieńnia da adpačynku, aŭtamabilaŭ i nieruchomaści. Vyniki apytańnia daśledčyki supastavili z danymi pra pavodziny spažyŭcoŭ, atrymanymi bolš jak ad tysiačy kampanij z roznych siektaraŭ rynku.

U vyniku analityki vyłučyli piać doŭhaterminovych tendencyj, jakija, na ich dumku, buduć upłyvać na rynak tavaraŭ i pasłuh. Adna ź ich — usio bolšaja kolkaść ludziej, jakija vybirajuć žyć adny.

U raźvitych krainach 30% chatnich haspadarak składajecca z adnaho čałavieka. U paraŭnańni z 2010 hodam ich dola vyrasła na 6%.

Asabliva prykmietnaja hetaja źjava ŭ Jeŭropie. U Hiermanii 43% chatnich haspadarak majuć tolki adnaho žychara. U Šviecyi ich dola dasiahaje 39%, a ŭ Francyi 38%. Padobnaja karcina nazirajecca i ŭ Azii. U Japonii adnaasobnymi źjaŭlajucca 39% chatnich haspadarak, u Paŭdniovaj Karei 36%.

Čamu ludzi vybirajuć žyć adny

Daśledavańnie pakazała, što za takim vybaram časta staić nie niemahčymaść znajści partniora, a žadańnie samastojnaści.

Dla 68% apytanych važnaja mahčymaść całkam kantralavać ułasnyja žyćciovyja rašeńni. 65% siarod pieravah nazvali spakoj, a 62% — niezaležnaść.

Ale žyćcio ŭ adzinočku maje i minusy. 45% respandentaŭ adznačyli, što ŭ takim vypadku ŭsia adkaznaść za paŭsiadzionnyja spravy kładziecca na adnaho čałavieka. Jašče adnym istotnym niedachopam apytanyja nazvali pačućcio adzinoty.

Biznes pakul nie paśpieŭ za novaj realnaściu

Rost kolkaści ludziej, jakija žyvuć adny, mianiaje i spažyvieckija zvyčki. Pavodle BCG, u raźliku na adnaho čałavieka takija chatnija haspadarki traciać u dva-try razy bolš, čym tyja, dzie žyvuć niekalki čałaviek.

Adnak ad 50 da 70% apytanych, jakija žyvuć adny, ličać, što tavary i pasłuhi pa-raniejšamu nie ŭličvajuć ich patreby.

Naprykład, im časta nie padychodziać vialikija ŭpakoŭki i akcyi, raźličanyja na kuplu niekalkich adnolkavych tavaraŭ. Dla takich spažyŭcoŭ bolšaje značeńnie majuć jakaść, zručny abjom upakoŭki i dastupnaść tavaru. Kuplać bolš dziela źnižki im niaredka niama sensu, bo častka praduktaŭ u vyniku prosta psujecca.

Navat anłajn-handal, adznačajuć daśledčyki, šmat u čym zastajecca raźličanym na siemji ź niekalkich čałaviek. Niazručnaści stvarajuć minimalnaja suma zamovy dla biaspłatnaj dastaŭki, vialikija ŭpakoŭki, a taksama nieabchodnaść być doma, kab atrymać ci viarnuć tavar.

Dla biznesu heta stanovicca ŭsio bolš istotnym. BCG prahnazuje, što da 2050 hoda dola chatnich haspadarak z adnym žycharom u Hiermanii i Japonii moža pieravysić 45%.

Tamu adaptavacca daviadziecca nie tolki vytvorcam praduktaŭ i restaranam. Źmieny zakranuć strachavańnie žyćcia i zdaroŭja, piensijnyja nazapašvańni, žyllo, aŭtamabili, dohlad za chatnimi žyviołami i bytavyja pasłuhi.

Kamientary da artykuła