Rasija i ZŠA abmiarkoŭvajuć šmatmiljardnuju naftavuju ździełku

Padčas pieramovaŭ pamiž ZŠA i Rasijaj ab spynieńni vajny va Ukrainie baki abmiarkoŭvajuć taksama šmatmiljardnuju ździełku, źviazanuju z aktyvami rasijskaj naftavaj kampanii «Łukojł». Pra heta 3 kastryčnika paviedamiła vydańnie The New York Times.

Pradstaŭniki Pucina Juryj Ušakoŭ i Kirył Dźmitryjeŭ z pradstaŭnikami Trampa Styvam Uitkafam i Džaredam Kušnieram na sustrečy ŭ Kramli, 22 studzienia 2026 hoda. Fota: Alexander Kazakov/Sputnik, Kremlin Pool Photo via AP

Ździełka moža achapić naftavyja radoviščy, naftapierapracoŭčyja zavody i sietku aŭtazapravačnych stancyj «Łukojła» ŭ roznych krainach. Havorka idzie, u pryvatnaści, pra radoviščy ŭ Kamierunie, naftapierapracoŭčyja pradpryjemstvy ŭ Jeŭropie i aŭtazapravačnyja stancyi ŭ amierykanskim štacie Ńju-Džersi. Dla jaje realizacyi spatrebicca ŭchvaleńnie ŭrada ZŠA i Kramla.

Pavodle źviestak The New York Times, u prasoŭvańni ździełki ŭdzielničajuć amierykanski inviestar i miljarder Tod Boeli, dźvie blizkaŭschodnija struktury, jakija raniej supracoŭničali z Džaredam Kušnieram abo siamjoj Styva Uitkafa, a taksama adno z padraździaleńniaŭ urada ZŠA. Boeli achviaravaŭ 2 miljony dalaraŭ na palityčnyja prajekty Donalda Trampa.

Hazieta adznačaje, što niama prykmiet taho, što niepasrednuju vyhadu ad ździełki atrymajuć sami Kušnier abo Uitkaf. Adnak, pavodle infarmacyi vydańnia, vyhadu mohuć atrymać źviazanyja ź imi dziełavyja partniory.

Temu hetaj ździełki, jak śćviardžaje The New York Times sa spasyłkaj na daśviedčanyja krynicy, Uładzimir Pucin zakranuŭ padčas sustrečy sa Styvam Uitkafam i Džaredam Kušnieram u Kramli 5 vieraśnia. Pavodle adnaho z surazmoŭcaŭ haziety, Pucin prapanavaŭ zaklučyć pahadnieńnie, kab prademanstravać rasijanam mahčymaść viadzieńnia biznesu sa Złučanymi Štatami.

Kančatkovaje rašeńnie ab ździełcy, pavodle infarmacyi vydańnia, zaležyć ad Uładzimira Pucina i Donalda Trampa.

Bieły dom, Ministerstva finansaŭ ZŠA i kampanija «Łukojł» nie adkazali na zapyty The New York Times z prośbaj prakamientavać infarmacyju.

Kamientary da artykuła