Kušnier Pucinu: Vy nam i hod nazad kazali, što za paru miesiacaŭ zojmiecie Danbas
Ziać prezidenta ZŠA Džared Kušnier padčas pieramovaŭ u Kramli pastaviŭ pad sumnieŭ zajavu Uładzimira Pucina ab chutkim zachopie Rasijaj usiaho Danbasa. Pra źjedlivuju repliku Kušniera paviedamiła The New York Times.
Sustreča Pucina z pradstaŭnikami Donalda Trampa Džaredam Kušnieram i Styvam Uitkafam adbyłasia ŭ Kramli 5 vieraśnia. Jak piša The New York Times, padčas pieramovaŭ Pucin demanstravaŭ upeŭnienaść. Jon zajaviŭ amierykancam, što na praciahu niekalkich miesiacaŭ rasijskija vojski narešcie voźmuć pad kantrol uvieś Danbas.
Pucin taksama zajaviŭ, što Rasija hatovaja nanieści maštabnyja ŭdary pa enierhasistemie Ukrainy, što moža zrabić budučuju zimu asabliva ciažkaj dla ŭkraincaŭ.
Kušnier pasprabavaŭ zapiarečyć Pucinu.
«Pry ŭsioj pavazie, vy kazali nam dakładna toje samaje hod tamu. Jakaja imaviernaść taho, što my vierniemsia siudy jašče praz hod, a vy znoŭ budziecie kazać toje samaje? Moža, nie budziem hublać hod?»
Hety abmien replikami The New York Times apisali čałaviek, znajomy z chodam pieramovaŭ, i amierykanski čynoŭnik. Vydańnie adznačaje, što jon dobra ilustruje dylemu, ź jakoj sutyknulisia namahańni Trampa pakłaści kaniec vajnie va Ukrainie, jakija praciahvajucca ŭžo bolš za 18 miesiacaŭ.
Adnym z klučavych pytańniaŭ na pieramovach zastajecca Danbas. NYT adznačaje, što stała zrazumieła: Ukraina nie źbirajecca vyvodzić vojski z toj častki svajoj terytoryi, jakuju Pucin patrabuje.
Paźniej Kušnier publična raskazaŭ pra hetuju prablemu padčas vystupu pa videasuviazi na sustrečy mižnarodnych prychilnikaŭ Ukrainy ŭ Kijevie.
«Prezident Pucin akreśliŭ liniju, jakoj jon choča dasiahnuć, — skazaŭ Kušnier. — Kali b Ukraina chacieła adyści da hetaj linii, tady, vidavočna, astatniaja častka pahadnieńnia ŭ nas užo padrychtavanaja. Ale Ukraina ciapier nie choča hetaha rabić».
Na hetym fonie administracyja Trampa šukaje novyja sposaby zaachvocić Rasiju da zakančeńnia vajny. Pavodle NYT, Bieły dom ciapier razhladaje mahčymaść zaklučeńnia biźnies-ździełak z Rasijaj jašče da spynieńnia bajavych dziejańniaŭ. Heta było b źmienaj u paraŭnańni z raniejšaj pazicyjaj Trampa, jaki zajaŭlaŭ, što biźnies z Rasijaj budzie mahčymy paśla ŭrehulavańnia vajny.
Adnačasova Kanhres ZŠA pryniaŭ zakonaprajekt, nakiravany suprać rasijskaha enierhietyčnaha siektara. Jon dazvalaje prezidentu ŭvodzić taryfy da 100 pracentaŭ suprać krain, jakija kuplajuć najbolš rasijskaj nafty abo hazu, a taksama praduhledžvaje sankcyi suprać rasijskich čynoŭnikaŭ, biźniesmienaŭ i finansavych ustanoŭ. Tramp daŭ zrazumieć, što padpiša zakonaprajekt.
Pajezdka Kušniera i Uitkafa ŭ Maskvu, a zatym u Kijeŭ stała sprobaj adnavić pieramovy, jakija raniej u hetym hodzie ŭ značnaj stupieni spynilisia. Pavodle ŭkrainskich čynoŭnikaŭ, trochbakovyja pieramovy ZŠA, Ukrainy i Rasii mohuć adnavicca ŭ kastryčniku. Na ich, jak čakajecca, moža abmiarkoŭvacca abmiežavanaje spynieńnie ahniu — u pryvatnaści, spynieńnie ŭdaraŭ pa enierhietyčnaj infrastruktury abo sudnachodstvie ŭ Čornym mory.
Ciapier čytajuć
Masavyja aryšty aficeraŭ prajšli na avijabazie ŭ Mačuliščach — abvinavačvajuć u suviaziach z apazicyjaj22
Masavyja aryšty aficeraŭ prajšli na avijabazie ŭ Mačuliščach — abvinavačvajuć u suviaziach z apazicyjaj
Julijana Šamietaviec z «Kibierpartyzanaŭ» stała maci — raskazvaje pra dekretny adpačynak u ZŠA i toje, ci sapraŭdy možna sumiaščać pracu z maciarynstvam1818
Kamientary