Na borcie adzinaha francuzskaha atamnaha avijanosca ŭspychnuŭ pažar

Na borcie francuzskaha avijanosca «Šarl de Hol» 5 kastryčnika adbyŭsia pažar. Karabiel ciapier prachodzić techničnaje absłuhoŭvańnie na vajskova-marskoj bazie ŭ Tułonie i pavinien zastavacca tam da pačatku śniežnia, piša Le Figaro.

Zdymak ilustracyjny. Fota: AP Photo/Joeal Calupitan

Pažar pačaŭsia paśla praviadzieńnia zvaračnych rabot z vykarystańniem hazavaj harełki ŭ adnym z techničnych pamiaškańniaŭ karabla. Sihnalizacyja spracavała niezadoŭha da 11:30. Uzharańnie adbyłosia ŭ pamiaškańni płoščaj nie bolš za 10 kvadratnych mietraŭ, raźmieščanym kala avijacyjnaha anhara. Padčas techničnaha absłuhoŭvańnia karabiel znachodzicca ŭ porcie, tamu ŭ anhary samalotaŭ niama.

Pieršymi z ahniom pačali zmahacca maraki ekipaža. Paźniej im na dapamohu prybyli pažarniki z vajskova-marskoj bazy Tułona. Pažar udałosia łakalizavać u 12:35, a całkam patušyć — u 13:50.

Pa infarmacyi marskich uładaŭ Mižziemnamorskaha rehijona, papiaredniaj pryčynaj uzharańnia ličacca raboty pa rezańni mietału hazavaj harełkaj. Na miescy praciahvajecca rasśledavańnie abstavin zdareńnia, da jakoha taksama dałučyli dadatkovyja siły bataljona marskich pažarnikaŭ z Marsela.

Nichto ź ludziej nie paciarpieŭ. Taksama nie było vyjaŭlena nijakaha ŭździejańnia pažaru na jadziernyja ŭstanoŭki avijanosca.

«Šarl de Hol» znachodzicca na techničnym absłuhoŭvańni z kanca žniŭnia. Da hetaha leta karabiel byŭ zadziejničany va ŭschodniaj častcy Mižziemnaha mora na fonie pahrozy pašyreńnia vajennaha kanfliktu na Blizkim Uschodzie.

«Šarl de Hol» źjaŭlajecca adnym ź niešmatlikich u śviecie atamnych avijanoscaŭ. Takija avijanoscy majuć tolki dźvie krainy — ZŠA, u jakich ich 11, i Francyja. Čakajecca, što ŭ 2038 hodzie francuzski karabiel zamienić novy avijanosiec «Svabodnaja Francyja» (La France Libre).

Kamientary da artykuła