Kiraŭnik niamieckaj raźviedki ličyć, što Hiermanija moža akazacca ŭ pramym uzbrojenym sutyknieńni z Rasijaj
Marcin Jehier śćviardžaje, što rasijskija śpiecsłužby dziejničajuć u Jeŭropie vysokaprafiesijna i biaźlitasna, a niebiaśpieka novych dyviersij zachoŭvajecca.
Pavodle acenki prezidenta Fiederalnaj raźviedvalnaj słužby Hiermanii Marcina Jehiera, uzrasła ryzyka pramoha vajennaha sutyknieńnia z Rasijaj.
Na publičnych słuchańniach pierad parłamienckim kantrolnym kamitetam Jehier zajaviŭ: «Kanfrantacyja, u jakoj my znachodzimsia z Rasijaj, nabyła novuju, bolš niebiaśpiečnuju jakaść: Hiermanija ryzykuje apynucca va ŭzbrojenym kanflikcie z Rasijaj. <…> Ni ad adnoj inšaj krainy zaraz nie zychodzić takoj pramoj, usioabdymnaj i kankretnaj pahrozy dla Hiermanii», piša Bild.
Jehier śćviardžaje, što rasijskija śpiecsłužby dziejničajuć u Jeŭropie vysokaprafiesijna i biaźlitasna, a niebiaśpieka novych dyviersij zachoŭvajecca. U kančatkovym vyniku rasijskaje kiraŭnictva choča «harantavać, kab u Bierlinie i inšych jeŭrapiejskich stalicach nie prymalisia palityčnyja rašeńni suprać Maskvy», zajaviŭ kiraŭnik niamieckaj raźviedki.
«Hiermanija stała hałoŭnaj pieraškodaj dla rasijskaj hiehiemaničnaj prajekcyi siły ŭ Jeŭropie i tym samym mišeńniu dla dziejańniaŭ Rasii. Toj, chto nie padparadkoŭvajecca, stanovicca praciŭnikam: takoje bačańnie Maskvy. … Rasija viadzie suprać nas cieniavuju vajnu. Hetaja nieabjaŭlenaja vajna nie ŭpisvajecca ŭ zvyčajnyja vajennyja abo pravavyja katehoryi. My nie znachodzimsia ŭ stanie abarony i ŭsio ž padviarhajemsia napadu — mienavita tamu heta cieniavy kanflikt», — kaža Jehier.
Pahrozy pramoha maštabnaha vajennaha napadu na NATA raźviedka zaraz nie bačyć.
Adnak Jehier papiaredžvaje ab mahčymaj «nizkaŭzroŭnievaj vajennaj aktyŭnaści Rasii», asabliva ŭ krainach Bałtyi.
«My pavinny rychtavacca da sprobaŭ zapałochvańnia i dalejšaha ŭmiašańnia. Vierahodna, znoŭ buduć i jadziernyja pahrozy», — skazaŭ kiraŭnik raźviedki.
Kamientary