Praŭradavyja siły ŭ Jemienie zajavili pra viartańnie kantrolu nad Bab-el-Mandebskim pralivam

Praŭradavyja siły Jemiena, jakija dziejničajuć pry padtrymcy Saudaŭskaj Aravii, zajavili pra pośpiech šyrokamaštabnaha nastupleńnia suprać chusitaŭ — prairanskaha paŭstanckaha ruchu, jaki bolš za dziesiać hadoŭ kantraluje značnyja terytoryi krainy, u tym liku stalicu Sanu, paviedamlaje Bi-bi-si.

Fota: AP Photo/Abdulnasser Alseddik

Pavodle jemienskich vajskoŭcaŭ, pry padtrymcy saudaŭskaj avijacyi ŭradavym siłam udałosia viarnuć pad svoj kantrol port Mocha i rajon Bab-el-Mandebskaha praliva, jaki złučaje Čyrvonaje mora ź Indyjskim akijanam. Paźniej jemienskaja armija paviedamiła taksama pra zachop aeraporta horada Dchubab i pačatak abłohi samoha horada, dzie zastavalisia atrady chusitaŭ.

Pradstaŭniki chusitaŭ pakul nie prakamientavali hetyja zajavy. Adnak padkantrolnyja im srodki masavaj infarmacyi admaŭlajuć, što ŭradavyja vojski prasunulisia ŭ bok Dchubaba.

Pa słovach urada Jemiena, u paniadziełak bajavyja dziejańni pačalisia i na inšych frantach, u tym liku ŭ napramku stalicy Sany. Kaalicyja praciŭnikaŭ chusitaŭ na čale z Saudaŭskaj Aravijaj zajaviła, što jaje źniščalniki kruhłasutačna padtrymlivajuć naziemnyja vojski z pavietra. Z pačatku nastupleńnia, pavodle kaalicyi, byli źniščanyja 324 važnyja celi.

Padkantrolny chusitam telekanał Al Masirah paviedamiŭ, što ŭ vyniku avijaŭdaraŭ u paniadziełak u dvuch rajonach Sany zahinuli školnica i žančyna. Pradstaŭnik chusitaŭ Machamied Abduł Sałam abvinavaciŭ Saudaŭskuju Araviju ŭ šmatlikich masavych zabojstvach i zajaviŭ, što kraina «ŭ poŭnaj miery adčuje na sabie ŭsie nastupstvy» svaich dziejańniaŭ.

Padparadkavany chusitam centr kantrolu za humanitarnymi apieracyjami papiaredziŭ cyvilnyja avijakampanii, što pavietranuju prastoru nad Saudaŭskaj Aravijaj ciapier nielha ličyć biaśpiečnaj i što jana stała zonaj bajavych dziejańniaŭ. Vyklučeńniem nazvanyja tolki pavietranyja prastory nad śviatymi dla musulman haradami Miekaj i Miedzinaj.

Nastupleńnie ŭradavych sił pačałosia na fonie novych vajennych pośpiechaŭ samich chusitaŭ. Raniej paviedamlałasia, što jany praciahvajuć zachoplivać novyja pazicyi, a linija frontu prachodzić kala klučavoha horada Taiz, jaki zastajecca pad kantrolem mižnarodna pryznanaha ŭrada Jemiena.

Jak paviedamlaje AFP, u niadzielu chusity pierarezali važny maršrut zabieśpiačeńnia, jaki złučaje Taiz z Adenam — časovaj stalicaj mižnarodna pryznanaha ŭrada. Sa spasyłkaj na troch pradstaŭnikoŭ jemienskich uzbrojenych sił ahienctva paviedamiła, što chusity ŭziali pad kantrol hety rajon i šlach zabieśpiačeńnia, faktyčna akružyŭšy Taiz.

U toj ža dzień vajskovy pradstaŭnik chusitaŭ Jachja Sary zajaviŭ, što hrupoŭka atakavała rakietami i bieśpiłotnikami abjekty saudaŭskaj naftavaj kampanii Aramco ŭ Er-Ryjadzie i ŭ bahatym na naftu rajonie Churajs na ŭschodzie krainy.

Pavodle adździeła pravierki danych BBC Verify, na spadarožnikavych zdymkach, zroblenych u subotu, nad naftapierapracoŭčym zavodam Aramco ŭ Er-Ryjadzie byli zaŭvažnyja kłuby čornaha dymu. Čorny dym taksama byŭ zaŭvažany nad naftavym radoviščam Churajs.

Jemien zastajecca adnoj z samych biednych krain śvietu i praciahvaje pieražyvać maštabny humanitarny kryzis. Vajna pačałasia ŭ 2014 hodzie, kali chusity zachapili stalicu Sanu, a zatym ustalavali kantrol nad značnaj častkaj poŭnačy krainy.

Saudaŭskaja Aravija ad pačatku padtrymlivała mižnarodna pryznany ŭrad Jemiena, a ŭ 2015 hodzie Er-Ryjad niepasredna ŭmiašaŭsia ŭ vajnu, stvaryŭšy kaalicyju ź niekalkich dziaržaŭ. Saudaŭskija i sajuźnickija siły pravodzili intensiŭnyja bambardziroŭki, ale chusitam udałosia zachavać uładu na zachoplenych terytoryjach.

Paśla niekalkich hadoŭ adnosnaha zacišša vajna adnaviłasia ŭ lipieni na fonie pašyreńnia kanfliktu na Blizkim Uschodzie. U vieraśni padčas imklivaha nastupleńnia chusity zachapili častku ŭźbiarežža krainy ŭzdoŭž Čyrvonaha mora, u tym liku Mochu i padychody da Bab-el-Mandebskaha praliva.

Heta stvaryła dla Saudaŭskaj Aravii pahrozu straty važnaha maršrutu, jaki moh vykarystoŭvacca jak alternatyva Armuzskamu pralivu dla ekspartu nafty. Takaja situacyja była vyhadnaja hałoŭnamu sponsaru chusitaŭ — Iranu, i ŭ vyniku Saudaŭskaja Aravija znoŭ była vymušanaja ŭstupić u niepasrednuju vajennuju kanfrantacyju z chusitami.

Pavodle Ministerstva achovy zdaroŭja Jemiena, z 6 žniŭnia ŭ vyniku bajavych dziejańniaŭ u krainie zahinuli nie mienš za 959 čałaviek, jašče kala 5 tysiač atrymali ranieńni. Pavodle źviestak AAN, jašče kala 197 tysiač žycharoŭ byli vymušanyja pakinuć svaje damy.

Kamientary da artykuła