Jemienskija chusity zachapili stratehičnyja astravy Bab-el-Mandebskaha praliva. Adzin z najbujniejšych handlovych šlachoŭ faktyčna apynuŭsia pad kantrolem bajevikoŭ
Pavodle ŭrada Jemiena, zaraz paŭstancy kantralujuć stratehičny praliŭ Bab-el-Mandeb, praź jaki prachodzić bolš za dziasiatuju častku suśvietnaha hruzapatoku. ZŠA admovilisia ad pramoha vajennaha ŭmiašańnia, niahledziačy na nieadnarazovyja prośby sajuźnikaŭ.
Jak paviedamlaje niamieckaje vydańnie DW, prairanski ruch chusitaŭ ustalavaŭ kantrol nad stratehičnymi astravami Pierym, Zukar i Chaniš. Faktyčna heta aznačaje zachop Bab-el-Mandebskaha praliva, adnaho z najvažniejšych marskich handlovych maršrutaŭ pamiž Adenskim zalivam i Čyrvonym moram. Uradavyja vojski Jemiena śpiešna pakinuli hetyja terytoryi, sastupiŭšy bajevikam taksama i prybiarežny partovy horad Mocha.
Bab-el-Mandebski praliŭ zastajecca paŭdniovymi varotami pamiž Azijaj i Jeŭropaj. Jaho kaštoŭnaść uzrasła šmatrazova paśla taho, jak vajna pamiž ZŠA, Izrailem i Iranam faktyčna spyniła ruch praz Armuzski praliŭ. Saudaŭskaja Aravija, pazbaŭlenaja svajho hałoŭnaha ŭschodniaha ekspartnaha akna, pieraaryjentavała pastaŭki nafty na zachad, da Čyrvonaha mora. Ciapier chusity začyniajuć i hetyja dźviery. Pradstaŭnik vajennaha kryła paŭstancaŭ Jachja Sary adkryta zajaviŭ, što sudnachodstva biaśpiečnaje dla ŭsich, akramia saudaŭskich karabloŭ.
Ekanamičny ŭdar pryjšoŭsia z roznych bakoŭ. Vydańnie BILD adznačaje, što ataki paŭstancaŭ pryviali da prypynieńnia pracy najvažniejšaha saudaŭskaha naftapravoda «Uschod—Zachad», jaki słužyŭ apošniaj alternatyvaj zabłakavanamu Armuzskamu pralivu. Suśvietnyja rynki adreahavali vokamhnienna, i cana za barel nafty marki Brent pieravysiła sto dziesiać dalaraŭ.
Na dniach amierykanskaja kampanija Anthropic aficyjna paviedamiła pra błakavańnie karystalnikaŭ z poŭnačy Jemiena, jakija z dapamohaj zvyčajnych smartfonaŭ namahalisia vykarystać štučny intelekt dla prajektavańnia hipierhukavych i balistyčnych rakiet.
Biaździejańnie Amieryki
Za stvareńniem novaha frontu staić niepasredna iranski Korpus vartavych isłamskaj revalucyi. Tehieran ščodra zabiaśpiečvaje svaich jemienskich proksi-sajuźnikaŭ finansami, zbrojaj i aficerskimi kadrami. Raźlik Irana vidavočny — maksimalna raściahnuć resursy praciŭnikaŭ i prymusić ich vajavać na niekalkich kirunkach adnačasova. Adnak hałoŭny praciŭnik na hetuju prynadu pakul nie kluje.
Spadčynny prync Saudaŭskaj Aravii Muchamied bin Sałman apynuŭsia ŭ situacyi katastrafičnaha cejtnotu. Jašče ŭ lipieni Er-Ryjad samanadziejna zapeŭnivaŭ Vašynhton u zdolnaści samastojna spravicca z chusitami, kali nanosiŭ previentyŭnyja ŭdary pa aeraporcie Sany. Siońnia rytoryka źmianiłasia na dyjamietralna supraćlehłuju. Prync dvojčy za dzień telefanavaŭ Donaldu Trampu z prośbaj nanieści pramyja amierykanskija ŭdary pa pazicyjach bajevikoŭ, jakija nabližalisia da praliva.
Haspadar Biełaha doma adkazaŭ ćviordaj admovaj. Amierykanskaja administracyja imkniecca luboj canoj paźbiehnuć pramoha ŭciahvańnia va ŭzbrojeny kanflikt z chusitami, abmiažoŭvajučysia pieradačaj raźvieddanych.
Kamandzir Centralnaha kamandavańnia ZŠA Bred Kupier terminova prybyŭ u Saudaŭskuju Araviju, dzie zaraz znachodziacca kala dźviuch sotniaŭ amierykanskich vajskoŭcaŭ, adnak ich misija nosić vyklučna kansultacyjny charaktar i nie praduhledžvaje ŭdziełu ŭ bajavych dziejańniach.
Chto z palitviaźniaŭ vyjšaŭ na svabodu 16 vieraśnia POŬNY ŚPIS23
Kamientary