Na fonie rostu cen na kaštoŭnyja mietały biełarusy čaściej stali zdavać srebra ŭ łambardy

Biełarusy stali prykmietna čaściej zdavać u łambardy vyraby sa srebra. Pryčym siarod takich rečaŭ sustrakajucca davoli niezvyčajnyja pradmiety, jakija paśla robiacca ekspanatami muziejaŭ, piša BiełTA.

Zdymak ilustracyjny. Fota: BiełTA

Načalnica adździeła ekśpiertna-analityčnaj atestacyi kaštoŭnaściaŭ Dziaržschovu Śviatłana Krućko ŭ intervju časopisu «Ekonomika Biełarusi» adznačaje, što ciapierašni ažyjataž, vidavočna, źviazany z tym, što ceny na srebra, jak i na zołata, dasiahnuli histaryčnaha maksimumu.

U łambardy ciapier masava niasuć srebnyja cukarnicy, souśnicy, čarnilnicy i inšyja pradmiety. Siarod ich traplajucca vyraby z klejmami ZŠA, Partuhalii i inšych krain.

Niadaŭna da śpiecyjalistaŭ pastupiła amierykanskaja srebnaja vaza 1950‑ch hadoŭ vahoj 1357 hramaŭ. Pavodle słoŭ Śviatłany Krućko, jaje prynios kalekcyjanier, jaki šmat hadoŭ tamu nabyŭ vazu vielmi tanna, a ciapier vyrašyŭ na joj zarabić.

Akramia roznych pradmietaŭ, biełarusy zdajuć u łambardy i srebnyja maniety. Siarod ich traplajucca kapiejki Rasijskaj impieryi XIX stahodździa roznych hadoŭ čakanki. Adnak vialikaj redkaściu jany nie ličacca, bo ŭ svoj čas vypuskalisia vialikimi tyražami.

Załatych maniet siarod takich pastupleńniaŭ značna mienš. Pieravažna heta carskija maniety naminałam piać i dziesiać rubloŭ 900‑j proby. Jany važać adpaviedna 4,3 i 8,6 hrama. Pavodle ekśpiertki, takija maniety ličylisia etałonnymi dziakujučy minimalnaj kolkaści damieškaŭ. U SSSR zołata ź ich, u pryvatnaści, vykarystoŭvali dla vyrabu zubnych karonak.

Razam z tym śpiecyjalisty niaredka vyjaŭlajuć siarod takich maniet padrobki. Vyznačyć ich byvaje niaprosta, bo falsifikaty mohuć całkam adpaviadać aryhinałam pa vazie i probie. Vydaje ich sposab vyrabu: padroblenyja maniety adlivajuć, tady jak sapraŭdnyja carskija maniety čakanili.

Da 1 listapada hetaha hoda 159 užo adabranych kaštoŭnych pradmietaŭ z zołata, srebra i płaciny pavinny pastupić u schoviščy abo staličnyja i abłasnyja muziei Biełarusi. 

Kamientary da artykuła