ZŠA padtrymali Łatviju ŭ baraćbie ź nielehalnaj mihracyjaj i vysoka acanili jaje hatoŭnaść uzajemadziejničać ź Biełaruśsiu

Dziaržsakratar ZŠA Marka Rubia padtrymaŭ Łatviju ŭ suviazi ź situacyjaj na łatvijska-biełaruskaj miažy i nazvaŭ nielehalnuju mihracyju surjoznaj pahrozaj dla biaśpieki Łatvii i ŭsiaho rehijonu. Pra heta paviedamiła ministarka zamiežnych spraŭ Łatvii Bajba Braže, apublikavaŭšy list Rubia.

Marka Rubia. Fota: Chip Somodevilla/Getty Images

Dziaržsakratar ZŠA padziakavaŭ łatvijskaj kalezie za kantakty z amierykanskaj kamandaj, jakaja zajmajecca biełaruskim kirunkam, a taksama sa śpiecyjalnym pasłańnikam prezidenta ZŠA pa Biełarusi Džonam Koŭłam. Pa słovach Rubia, padčas razmovy Braže i Koŭła jany padrabiazna abmierkavali prablemu nielehalnaj mihracyi.

Marka Rubia zajaviŭ, što ZŠA razumiejuć zaniepakojenaść Łatvii situacyjaj na miažy i vysoka aceńvajuć jaje imknieńnie kantralavać dziaržaŭnuju miažu, a taksama hatoŭnaść uzajemadziejničać ź biełaruskimi ŭładami pa hetym pytańni.

Jon taksama nazvaŭ Łatviju nadziejnym sajuźnikam ZŠA ŭ NATA i adznačyŭ jaje ŭkład u zabieśpiačeńnie rehijanalnaj biaśpieki. Akramia taho, Rubia padziakavaŭ Łatvii za pracu ŭ ramkach Jeŭrasajuza i AAN, u tym liku za namahańni pryciahnuć kubinski režym da adkaznaści za jaho dziejańni.

Bajba Braže, u svaju čarhu, zajaviła, što Łatvija ciesna supracoŭničaje z administracyjaj ZŠA ŭ baraćbie ź nielehalnaj mihracyjaj i inšymi pahrozami na miažy. Pavodle jaje, takoje supracoŭnictva spryjaje ŭmacavańniu ŭsiaho NATA.

Kamientary da artykuła