MZS Łatvii paśla sustrečy z Koŭłam: Sankcyi suprać Biełarusi pavinny zachoŭvacca
17 vieraśnia ministarka zamiežnych spraŭ Łatvii Bajba Braže sustrełasia sa śpiecyjalnym pasłańnikam prezidenta ZŠA pa pytańniach Biełarusi Džonam Koŭłam. Jany abmierkavali situacyju na łatvijska-biełaruskaj miažy i mahčymaści spynieńnia vykarystańnia mihracyi biełaruskim režymam jak instrumienta cisku, paviedamiła pres-słužba MZS Łatvii.
Bajba Braže padziakavała ZŠA za padtrymku biaśpieki Łatvii i krain Bałtyi, u tym liku za dapamohu va ŭmacavańni łatvijskaj miažy jak źniešniaj miažy ES i NATA. Jana taksama adznačyła ŭdzieł ZŠA ŭ vyzvaleńni biełaruskich palityčnych źniavolenych.
Pavodle Braže, mižnarodnaja supolnaść pavinna praciahvać cisk na biełaruskija ŭłady, pakul u Biełarusi zachoŭvajucca represii suprać hramadzian i dziejańni, jakija, na dumku łatvijskaha boku, stvarajuć pahrozu biaśpiecy susiednich krain.
Ministarka raspaviała amierykanskamu śpiecpasłańniku pra situacyju na łatvijska-biełaruskaj miažy i miery, jakija Łatvija prymaje dla jaje ŭmacavańnia. Z pačatku 2026 hoda łatvijskija słužby praduchilili bolš za 11 tysiač sprob niezakonnaha pierasiačeńnia miažy z boku Biełarusi.
Braže zajaviła, što biełaruskija ŭłady praciahvajuć vykarystoŭvać mihracyju jak srodak cisku na Łatviju i Jeŭrasajuz. Pavodle jaje, heta nie tolki pytańnie mihracyi, ale i častka bolš šyrokaj stratehii, jakaja, jak śćviardžaje łatvijski bok, pavinna asłablać adzinstva sajuźnikaŭ, stvarać dadatkovuju nahruzku na łatvijskuju pamiežnuju słužbu i pavialičvać ryzyki dla biaśpieki miežaŭ ES i NATA.
Ministarka taksama vystupiła za praciah i ŭzmacnieńnie sankcyjnaha cisku na biełaruski režym. Pavodle jaje, sankcyi pavinny zachoŭvacca, pakul praciahvajucca represii ŭ Biełarusi, vykarystańnie mihracyi jak instrumienta cisku i inšyja dziejańni, jakija Łatvija razhladaje jak pahrozu dla svajoj biaśpieki i biaśpieki inšych krain ES i NATA.
Kamientary