Ci puścić Łatvija biełaruski kalij? Daviedalisia, što pačuŭ Koŭł u Ryzie

17 vieraśnia Ryhu naviedaŭ śpiecyjalny pasłańnik prezidenta ZŠA pa Biełarusi Džon Koŭł. Jon sustreŭsia z premjer-ministram Łatvii Andrysam Kułbierhsam, ministarkaj zamiežnych spraŭ Bajbaj Braže i kiraŭnictvam Dziaržaŭnaj pamiežnaj achovy. Padčas pieramoŭ značnuju ŭvahu nadali biaśpiecy ŭschodniaj miažy Łatvii, nielehalnaj mihracyi, jakuju łatvijskija ŭłady ličać instrumientam hibrydnaha cisku Minska, a taksama namahańniam ZŠA pa vyzvaleńni biełaruskich palitviaźniaŭ.

Napiaredadni Džon Koŭł sustrakaŭsia z kiraŭnictvam Litvy i anansavaŭ pajezdku ŭ Łatviju, kab, pavodle jaho słoŭ, usie baki mahli ŭzhadnić dalejšyja dziejańni. Adnoj z mahčymych tem pieramoŭ nazyvali tranzit biełaruskaha kaliju. 

«Ździełka pa kalijnych uhnajeńniach znachodzicca ŭ vielmi dobrym stanie, kab arhanizavać pastaŭki kaliju ź Biełarusi ŭ ZŠA — hetaha choča prezident Tramp», — cytuje amierykanskaha dypłamata The New York Times.

«Pazicyja Ryhi zastajecca niaźmiennaj»

Daradca Śviatłany Cichanoŭskaj pa dypłamatyi Dzianis Kučynski raskazaŭ «Našaj Nivie», što ŭ dzień vizitu Koŭła byŭ na suviazi z łatvijskimi kalehami.

Niezadoŭha da hetaha jon sam naviedvaŭ Ryhu i pravioŭ kansultacyi z hałoŭnym daradcam premjer-ministra Łatvii pa mižnarodnaj palitycy i pradstaŭnikami MZS. Padčas tych sustreč abmiarkoŭvali rehijanalnuju biaśpieku, pravakacyi z boku režymu Łukašenki i padtrymku biełarusaŭ u Łatvii i Jeŭrasajuzie.

Pavialičyć

«Siońnia łatvijskija partniory jašče raz paćvierdzili mnie, što pazicyja Łatvii zastajecca paśladoŭnaj i niaźmiennaj. Ryha vitaje vyzvaleńnie biełaruskich palitviaźniaŭ i vysoka aceńvaje namahańni Złučanych Štataŭ i śpiecyjalnaha pasłańnika Džona Koŭła. My zacikaŭlenyja ŭ tym, kab hety dypłamatyčny trek praciahvaŭsia i pryvioŭ da vyzvaleńnia ŭsich palityčnych źniavolenych», — adznačyŭ Dzianis Kučynski.

Razam z tym, łatvijski bok nie bačyć padstaŭ kazać pra istotnyja źmieny ŭ palitycy biełaruskaha režymu:

«Praciahvajucca represii, padtrymka rasijskaj ahresii suprać Ukrainy i hibrydny cisk na krainy Jeŭrasajuzu. Tamu pazicyja Łatvii adnosna zachavańnia palityčnaha i sankcyjnaha cisku zastajecca niaźmiennaj. Heta datyčycca i ekanamičnaha cisku, u tym liku kalijnaha pytańnia».

U centry ŭvahi — situacyja na miažy

Što tyčycca źmiestu pieramoŭ u Ryzie, Dzianis Kučynski asobna adznačyŭ, što najbolšuju ŭvahu łatvijski bok nadaŭ nielehalnaj mihracyi i situacyi na ŭschodniaj miažy Jeŭrasajuza:

«Pry hetym važna padkreślić: centralnym pytańniem u razmovach łatvijskaha boku z amierykanskimi partniorami była nielehalnaja mihracyja i mihracyjny cisk, jaki režym Łukašenki praciahvaje akazvać na Łatviju i ŭschodniuju miažu Jeŭrasajuza, a nie pytańnie kalijnych uhnajeńniaŭ».

Pazicyi Vašynhtona i Ryhi sychodziacca ŭ nieabchodnaści praciahvać pracu dziela vyzvaleńnia biełaruskich palitviaźniaŭ. Pry hetym Łatvija ličyć važnym zachoŭvać ryčahi ŭździejańnia na režym, pakul u Biełarusi praciahvajucca represii, a Minsk padtrymlivaje rasijskuju ahresiju i akazvaje hibrydny cisk na susiednija krainy.

Pra nieabchodnaść zachoŭvać sankcyjny cisk paśla sustrečy z Koŭłam zajaviŭ premjer-ministr Łatvii Andrys Kułbierhs. Jak paviedamiła jaho kancylaryja, Ryha padtrymlivaje zachavańnie, pašyreńnie i ŭzmacnieńnie sankcyj Jeŭrasajuza ŭ dačynieńni da režymu Łukašenki. 

Ministarka zamiežnych spraŭ Łatvii Bajba Braže paśla sustrečy paviedamiła, što baki damovilisia pra praktyčnyja kroki dla ŭmacavańnia ŭschodniaj miažy NATA.

«Dla nas pazicyja Łatvii — važny sihnał: vyzvaleńnie ludziej i dyjałoh dziela ich vyzvaleńnia pavinny praciahvacca, ale heta nie moža aŭtamatyčna aznačać narmalizacyju adnosin ci źniaćcie cisku. My pavinny damahacca vyzvaleńnia ŭsich palitviaźniaŭ i adnačasova zachoŭvać ryčahi ŭździejańnia na režym», — padsumavaŭ Dzianis Kučynski.

Ludziej vyzvalajuć, represii praciahvajucca

Novy raŭnd dypłamatyi adbyvajecca adrazu paśla pieramoŭ Džona Koŭła z Łukašenkam. 16 vieraśnia ź biełaruskich turmaŭ vyzvalili 25 čałaviek. U adkaz Vašynhton pahadziŭsia źniać amierykanskija sankcyi z «Biellespapieraprama» i pradpryjemstva «Łakafarba». Koŭł taksama zajaviŭ, što ciaham miesiaca mohuć być vyzvalenyja jašče sotnia ci bolš čałaviek.

Tym časam u biełaruskich turmach, pavodle pravaabaroncaŭ, zastajucca amal 900 palitviaźniaŭ. Śviatłana Cichanoŭskaja, sustrakajučy vyzvalenych u Vilni, adznačała, što asobnyja vyzvaleńni nielha ŭsprymać jak prykmietu palityčnych pieramien: represii ŭ Biełarusi praciahvajucca, a Łukašenka vykarystoŭvaje ludziej jak tavar dla pieramoŭ. 

Pieramovy vakoł kaliju pry hetym zastajucca bolš składanymi za dvuchbakovuju damoŭlenaść pamiž Vašynhtonam i Minskam. Navat paśla źmiakčeńnia amierykanskich abmiežavańniaŭ tranzit zaležyć ad pazicyi susiednich dziaržaŭ i sankcyj Jeŭrasajuza. U mai ministr zamiežnych spraŭ Litvy Kiastucis Budrys zajaviŭ, što Vilnia nie budzie abmiarkoŭvać adnaŭleńnie ekspartu biełaruskaha kaliju praź Litvu, u tym liku praz Kłajpiedski port, pakul dziejničajuć sankcyi Jeŭrasajuza.

• 9
• 0
• 3
• 1
• 0
• 0
• 0
• 0