Rasijskaha pastaŭščyka redkaziamielnych mietałaŭ vyklučyli z novaha pakieta sankcyj ES pa prośbie Estonii

U samym maštabnym pakiecie sankcyj, jaki padrychtavaŭ Jeŭrapiejski sajuz suprać Rasii, budzie na dźvie pazicyi mienš, čym płanavałasia pieršapačatkova. Žurnalist «Radyjo Svabodnaja Jeŭropa» Rykard Joźviak paviedamiŭ, što paśla ŭmiašańnia Estonii sa śpisu byli vyklučanyja adna jurydyčnaja i adna fizičnaja asoba. Chto mienavita — nie nazyvajecca.

Zdymak ilustracyjny. Fota: vecteezy.com

«1 kampanija i 1 čałaviek byli faktyčna vyklučanyja ź pieršapačatkovaha prajekta pa prośbie Estonii. Havorka idzie pra kampaniju, jakaja pastaŭlaje redkaziamielnyja mietały estonskaj Silmet, jakaja vykarystoŭvaje hety materyjał dla vytvorčaści vietravych turbin i h. d. Kampanija šukaje alternatyŭnyja krynicy pastavak», — napisaŭ Joźviak.

Zdabyčaj i pierapracoŭkaj redkaziamielnych mietałaŭ u Rasii zajmajucca kampanii, źviazanyja ź dziaržaŭnaj karparacyjaj «Rasatam», takija jak Salikamski mahnijevy zavod, «Rasatam nietry» i inšyja, a taksama šerah samastojnych pradpryjemstvaŭ.

U Asacyjacyju vytvorcaŭ i spažyŭcoŭ redkich i redkaziamielnych mietałaŭ uvachodziać 17 kampanij (akcyjaniernych tavarystvaŭ i tavarystvaŭ z abmiežavanaj adkaznaściu), «jakija majuć vytvorčaść pa zdabyčy i pierapracoŭcy [hetych mietałaŭ] i pradukcyi na ich asnovie, atrymańni materyjałaŭ dla ich zdabyčy, vyrabie abstalavańnia».

7 kastryčnika pasły krain ES uzhadnili 22‑hi pakiet sankcyj. U čorny śpis trapili 1646 arhanizacyj i fizičnych asob. Pieravažnaja bolšaść ich źviazana z rasijskim VPK, ale 77 čałaviek taksama płanujecca pakarać za ŭdzieł u vybarach u Dziaržaŭnuju dumu RF ad akupavanych ukrainskich terytoryj. Takoha maštabnaha pašyreńnia śpisu jašče nie było. Novy pakiet płanujecca kančatkova ŭchvalić u paniadziełak.

Kierstyn Lepik, pres-sakratarka pradstaŭnictva Estonii ŭ Brusieli, paćvierdziła vydańniu ERR, što adna rasijskaja kampanija i «źviazanaja ź joj fizičnaja asoba» byli vyklučanyja pa prośbie Talina. Pavodle słoŭ Lepik, hetaja kampanija pastaŭlaje Silmet «materyjały, jakija majuć stratehičnaje značeńnie dla jeŭrapiejskich halin», u tym liku dla vytvorčaści elektramabilaŭ i vietravych turbin, a taksama dla «elektronnaj, aŭtamabilnaj i avijacyjnaj halin va ŭsim Jeŭrapiejskim sajuzie».

Lepik taksama zajaviła, što Silmet aktyŭna šukaje alternatyvu pastaŭkam z Rasii, dadaŭšy:

«Estonija ŭ nastupnym hodzie pierahledzić pytańnie ab uklučeńni hetaj rasijskaj kampanii i fizičnaj asoby ŭ sankcyjny śpis».

Kamientary da artykuła