Paźniak pra palityku ES: Faktyčna heta palityka antybiełaruskaja

Lidar ruchu «Volnaja Biełaruś», staršynia partyi KCHP-BNF Zianon Paźniak na «Biełsacie» raskazaŭ, što bačyć dźvie pryčyny vyzvaleńnia ŭsiaho 25 palitviaźniaŭ, kali čakałasia vyzvaleńnie 200 ci bolš.

Paźniak nazvaŭ dobraj navinoj toje, što pastaŭki biełaruskaha kaliju pajšli ŭ Złučanyja Štaty, ale kiepskaj navinoj — toje, što jany pajšli praz rasiejski port, bo heta doraha i heta «peŭnaja zaležnaść ad Rasiei». Pryčynaj hetaha jon nazvaŭ supraciŭ ES:

«ES pravodzić svaju palityku, abapirajučysia na niepryniaćcie asabista Łukašenki, režymu Łukašenki, — skazaŭ Paźniak. — A faktyčna heta palityka antybiełaruskaja. Tamu što ŭ Biełarusi hałoŭnaje nie Łukašenka, a hałoŭnaje — narod, hałoŭnaje — dziaržava».

Litva, ličyć jon, «poŭnaściu pad upłyvam Brusielu», a z Łatvijaj «byli prablemy», dy praz «cisk Brusielu» ŭdałosia pierakanać Łatviju nie puskać biełaruski kalij. Heta, na dumku Paźniaka, «antybiełaruskaja palityka», jakaja «supiarečyć mižnarodnamu zakanadaŭstvu».

Pastaŭki kaliju Štatam nie paspryjajuć «adryvańniu» Biełarusi ad Rasiei, kanstatavaŭ Paźniak. Ale jon ličyć dobrym sam fakt taho, što ZŠA pajšli na handal ź Biełaruśsiu. Kaža, vystupaje za takoje, bo heta daść vyzvalić palitviaźniaŭ i likvidavać sankcyi, jakija «bjuć pa narodzie, nie pa Łukašenku».

Z kalijem jon źviazvaje toje, što paśla apošnich pieramovaŭ śpiecyjalnaha pasłańnika prezidenta ZŠA Džona Koŭła z Alaksandram Łukašenkam vyzvalili tolki 25 palitviaźniaŭ. Jon nazvaŭ dźvie pryčyny.

Pieršaja, na dumku Paźniaka, u tym, što «za niekalki miesiacaŭ da pryjezdu Koŭła išła vialikaja kampanija ŭ druku, psieŭdadruku, vystupali roznyja błohiery tam, ekśpierty, i havaryli, jak tryumfalna Koŭł zavajoŭvaje mahčymaści, što heta buduć vyzvalenyja ŭsie, što Łukašenka ničoha nie vyrašaje, a vot vyrašaje Koŭł». Łukašenka ž, ličyć Paźniak, na takoje pakryŭdziŭsia i vyrašyŭ «pakazać, chto ŭ domie haspadar».

Druhaja pryčyna, kaža Paźniak, u tym, što čakalisia pastaŭki kaliju praz bałtyjskija party: «Koŭł namiakaŭ na heta, jany spadziavalisia». Zładzić hetyja pastaŭki, ličyć jon, nie ŭdałosia, bo «Jeŭropa zaraz pravodzić antyamierykanskuju palityku ŭ peŭnych aśpiektach.

Pieramovy ZŠA z Łukašenkam Paźniak vitaje, bo «vielmi važna, kab Biełaruś zastavałasia niezaležnaj dziaržavaj».

A palityku Litvy i Łatvii jon nazyvaje «škodnaj dla ichnych nacyjanalnych intaresaŭ», bo «niezaležnaść Litvy i Łatvii zaležyć ad niezaležnaj Biełarusi».

Palityku Polščy, jakaja bačyć «nievialikaje paciapleńnie» z Łukašenkam, Paźniak chvalić: hetaja palityka nie tolki ŭ pieramovach z Łukašenkam, ale i ŭ padtrymcy «Biełsatu», u pracy Polskaha radyjo na biełaruskaj movie. Pieramovy Polščy ź Biełaruśsiu, ujaŭlaje Paźniak, mohuć być praciahnutyja, pieraviedzienyja na temy adnaŭleńnia transpartnych suviaziaŭ, u tym liku čyhunki i avijacyi; raźvićcia pamiežnaha handlu — i ŭrešcie «viartańnia da narmalnych adnosinaŭ».

«Heta nie pryviadzie da taho, jak było raniej, tamu što situacyja zaraz vielmi niebiaśpiečnaja, — sprahnazavaŭ Paźniak. — Jana nie pryviadzie da toj libieralizacyi, da spynieńnia represijaŭ, ale krok za krokam jana moža stanovišča palepšyć».

«Ja maju źviestki. Liču, što niedakładnyja. Da 2032 hoda ŭkładzienyja śpisy, kožny dzień buduć aryštoŭvać, — raspavioŭ siarod inšaha Paźniak. — ­­­Da 32‑ha hoda hubaziki i milicyja zabiaśpiečanyja rabotaj, buduć chapać ludziej».

Tamu jon ličyć, što pieramovy dajuć pierśpiektyvy źmienaŭ, kali palityka budzie paśladoŭnaj.

Biełarusaŭ u Polščy, jakija bajacca, što «paciapleńnie» z Łukašenkam pojdzie za ichny košt, Paźniak ličyć nieciarplivymi. Jon patłumačyŭ: «Heta praces, i niamožna pieraskakvać praz peŭnyja etapy».

Na jahonuju dumku, pieršy krok — vyzvaleńnie Andreja Pačobuta. Druhi krok — sustreča ministraŭ zamiežnych spravaŭ. Zatym — nastupnyja kroki. Mahčyma, dazvoł niekatorym biełarusam viarnucca na radzimu abo dazvoł afarmlać dakumienty za miažoj.

Paźniak padkreśliŭ: represii tryvajuć, ale «heta siońnia tak, a zaŭtra budzie inakš» pry ŭmovie, što buduć tryvać pieramovy. Kali nie było pieramovaŭ, nie było i zruchaŭ.

• 22
• 2
• 1
• 24
• 1
• 1
• 3
• 1