Novy ŭkrainski zakon maje spraścić žyćcio biełarusam, jakija zastalisia bieź dziejnych dakumientaŭ

Dziaržaŭnaja mihracyjnaja słužba Ukrainy apublikavała zakonaprajekt ab źmienach u zakanadaŭstva, jakija tyčacca dakumientavańnia zamiežnikaŭ i asob biez hramadzianstva. U tym liku jon praduhledžvaje rašeńni dla ludziej, jakija nie mohuć atrymać abo abmianiać pašparty praz spynieńnie dziejnaści dypłamatyčnych pradstaŭnictvaŭ ichnich krain va Ukrainie. Prajekt zakranaje i hramadzian Biełarusi, piša Misija demakratyčnych sił Biełarusi va Ukrainie.

Zdymak ilustracyjny. Fota: «Naša Niva»

Pavodle prapanavanych źmien, u vyznačanych zakonam vypadkach biełarusy zmohuć abmieńvać paśviedčańni na časovaje žycharstva navat z praterminavanymi pašpartami. Taksama płanujecca dazvolić afarmleńnie paśviedčańniaŭ na pastajannaje žycharstva z praterminavanym pašpartam, a ŭ asobnych situacyjach — navat z kopijaj stračanaha pašparta, kali raniej jon užo padavaŭsia ŭ mihracyjnuju słužbu.

Kali paśviedčańnie budzie aformlenaje pavodle novaha paradku, čałaviek zmoža zakonna zastavacca va Ukrainie i paśla zakančeńnia terminu dziejańnia pašparta.

Misija demakratyčnych sił Biełarusi padtrymlivaje hety zakonaprajekt i nakiravała ŭ Dziaržaŭnuju mihracyjnuju słužbu dźvie kankretnyja prapanovy.

Pieršaja — pašyryć mahčymaść vykarystoŭvać praterminavany pašpart pry atrymańni dazvołu na imihracyju na siamiejnikaŭ hramadzian Ukrainy. Heta tyčycca muža abo žonki paśla dvuch hadoŭ šlubu, dziaciej i baćkoŭ.

Druhaja prapanova — źviazać dziejańnie śpiecyjalnaha paradku nie z terminam vajennaha stanovišča, a z faktyčnaj adsutnaściu konsulskich pasłuh vydačy i abmienu pašpartoŭ. Zaviaršeńnie vajennaha stanovišča samo pa sabie nie aznačaje, što takija pasłuhi buduć adnoŭlenyja.

Asobnych źmien dla ludziej, jakija nie majuć dziejnych dakumientaŭ i raniej nie prajšli pieršasnuju lehalizacyju va Ukrainie, misija ŭ miežach hetaha zakonaprajekta nie prapanoŭvała. Ichniaja situacyja patrabuje asobnaha abmierkavańnia i, vierahodna, śpiecyjalnaj pracedury ŭstanaŭleńnia asoby i dakumientavańnia, a nie tolki dadatkovaha vyklučeńnia dla ŭładalnikaŭ praterminavanych pašpartoŭ.

Kamientary da artykuła