Kitaj imkniecca stać suśvietnym lidaram u halinie niejrainterfiejsaŭ
Kitaj maje namier stać suśvietnym lidaram u raspracoŭcy niejrainterfiejsaŭ — technałohij, jakija dazvalajuć čałaviečamu mozhu niepasredna ŭzajemadziejničać z kampjutarami, pratezami i inšymi elektronnymi pryładami. Jak piša The Economist, niejrainterfiejsy stanoviacca novym kirunkam technałahičnaha supiernictva pamiž Kitajem i ZŠA.
Zdymak ilustracyjny. Fota: Kevin Frayer/Getty Images
Piekin uklučyŭ niejratechnałohii da liku pryjarytetnych halin novaj piacihodki na 2026—2030 hady. Siarod inšych pryjarytetaŭ — kvantavyja vyličeńni, humanoidnaja robatatechnika i termajadziernaja enierhietyka.
U Kitai ŭžo pracujuć sotni startapaŭ i tysiačy pastaŭščykoŭ, jakija zajmajucca raspracoŭkaj i vytvorčaściu niejrainterfiejsaŭ.
NeuroXess — adna ź viadučych kitajskich kampanij u halinie całkam biespravadnych mazhavych impłantaŭ. Jana ŭžo pravodziła kliničnyja vyprabavańni.
StairMed raspracoŭvaje niejraimpłanty i atrymlivaje padtrymku technałahičnaha hihanta Alibaba. Kampanija NeuCyber zajmajecca impłantavanymi niejrainterfiejsami pry dziaržaŭnaj padtrymcy. BrainCo vyrablaje nieinvaziŭnyja pryłady i bijaničnyja pratezy, jakimi možna kiravać z dapamohaj elektryčnych sihnałaŭ, što sčytvajucca z arhanizma.
Adnačasova raźvivajecca rynak nieinvaziŭnych niejratechnałohij. Kala 20‑ci kitajskich kampanij užo pradajuć pieranosnyja pryłady — ad sistem manitorynhu snu da hulniavych interfiejsaŭ, jakija vykarystoŭvajuć elektryčnuju aktyŭnaść mozhu.
Kitaj farmuje cełuju dziaržaŭnuju ekasistemu dla raźvićcia hetaj haliny, jakaja ŭklučaje finansavańnie, rehulavańnie, miedycynskuju infrastrukturu i padrychtoŭku śpiecyjalistaŭ.
Naprykład, vosieńniu 2026 hoda Ciańdziński ŭniviersitet pačynaje navučańnie pieršych studentaŭ pa asobnaj bakałaŭrskaj prahramie, pryśviečanaj niejrainterfiejsam.
Kitaj imkniecca prymianić u niejratechnałohijach toj ža padychod, jaki raniej vykarystoŭvaŭ u śfierach elektramabilaŭ, akumulataraŭ i robatatechniki: pieratvaryć pierśpiektyŭny navukovy kirunak u maštabnuju pramysłovuju halinu.
Kali amierykanskaja kampanija Neuralink Iłana Maska stała adnym ź simvałaŭ technałahičnaha praryvu ŭ hetaj śfiery, to Kitaj robić staŭku na stvareńnie cełaj industryi, zdolnaj masava vyrablać padobnyja pryłady dla suśvietnaha rynku.
Čytajcie taksama:
Chutka kožny zmoža mieć šapku, jakaja čytaje dumki
Ułady ZŠA nie dazvolili pačać testavańnie na ludziach pryłady kampanii Neuralink Iłana Maska
35 maładych biełarusaŭ i biełarusak, za jakimi varta sačyć: apublikavany pieršy śpis Next 35