Chutka kožny zmoža mieć šapku, jakaja čytaje dumki

Siońnia funkcyja pieraŭtvareńnia hołasu ŭ tekst jość amal u kožnym kampjutary i smartfonie. Ale, jak piša Wired, startap Sabi z Kremnijevaj daliny choča pajści značna dalej — zrabić tak, kab čałavieku nie treba było navat havaryć uhołas. Dastatkova budzie prosta padumać.

Kampanija raspracoŭvaje pryładu dla mozha, jakaja dekaduje ŭnutranaje maŭleńnie čałavieka ŭ słovy na ekranie kampjutara. Pieršy pradukt pavinien vyhladać jak zvyčajnaja viazanaja šapka, a paźniej źjavicca i viersija ŭ formie biejsbołki.

Technałohija adnosicca da tak zvanych interfiejsaŭ «mozh — kampjutar» (Brain-Computer Interface, BCI). Takija sistemy stvarajuć pramuju suviaź pamiž niervovaj sistemaj čałavieka i elektronnaj pryładaj. Najbolš viadomyja raspracoŭki ŭ hetaj śfiery źviazanyja ź imiem Iłana Maska i jaho kampanijaj Neuralink, jakaja pracuje nad impłantami dla ludziej ź ciažkimi parušeńniami ruchalnaj sistemy.

Ale Sabi robić staŭku nie na ŭžyŭleńnie čypaŭ u mozh, a na nieinvaziŭnuju nosnuju pryładu.

Inviestar kampanii, viadomy vienčurny kapitalist Vinad Chosła, jaki raniej układaŭ hrošy ŭ OpenAI, ličyć, što mienavita adsutnaść chirurhičnaha ŭmiašańnia źjaŭlajecca adzinym mahčymym šlacham dla masavaha raspaŭsiudžvańnia BCI, patencyjnaja aŭdytoryja jakich moža dasiahnuć miljarda čałaviek.

Pavialičyć

Sutnaść technałohii

Asnovaj raspracoŭki Sabi stała technałohija elektraencefałahrafii (EEH). Jana vykarystoŭvaje datčyki na pavierchni hałavy, jakija sčytvajuć elektryčnuju aktyŭnaść mozha. Dekadavańnie ŭjaŭnaha maŭleńnia z dapamohaj EEH užo mahčymaje, ale na hety momant jano abmiežavana nievialikimi naborami słoŭ abo kamand, a nie bieśpierapynnym naturalnym maŭleńniem.

Hałoŭnaja prablema ŭ tym, što sihnały mozha davodzicca sčytvać praz skuru i kości čerapa, a heta istotna asłablaje ich. Mienavita tamu impłantavanyja čypy pracujuć dakładniej: jany znachodziacca niepasredna pobač ź niejronami.

U Sabi ličać, što vyrašyć prablemu možna za košt vielizarnaj kolkaści datčykaŭ. Kali zvyčajnyja EEH-pryłady vykarystoŭvajuć ad dziasiatka da niekalkich sotniaŭ siensaraŭ, to ŭ šapcy Sabi ich budzie ad 70 000 da 100 000. Takaja ščylnaść dazvalaje značna dakładniej vyznačać, dzie i kali ŭźnikaje niejronnaja aktyŭnaść.

Na starcie sistema pavinna zabiaśpiečvać chutkaść naboru kala 30 słoŭ za chvilinu. Heta pavolniej za zvyčajny druk na kłavijatury, ale ŭ kampanii śćviardžajuć, što z časam chutkaść budzie raści, bo sistema pastupova adaptujecca da karystalnika.

Prablemy

Asnoŭnaj pieraškodaj dla takich technałohij zastajecca indyvidualnaja varyjatyŭnaść: mazhavaja aktyŭnaść roznych ludziej pry adnolkavych dumkach moža adroźnivacca. Kab spravicca z hetym, Sabi stvaraje «bazavuju madel mozha» na asnovie štučnaha intelektu, navučanuju na 100 000 hadzinach danych, atrymanych ad sotni dobraachvotnikaŭ.

Niezaležnyja ekśpierty ŭ śfiery niejratechnałohij adznačajuć, što pośpiech takich pryład budzie zaležać nie tolki ad dakładnaści, ale i ad zručnaści. Bolšaść sučasnych niejrainterfiejsaŭ patrabujuć naładki pierad kožnym vykarystańniem, tamu što sihnały mozha mohuć źmianiacca ŭ zaležnaści ad stomlenaści, kancentracyi i navat nastroju čałavieka.

Dla masavaha rynku pryłada pavinna pracavać adrazu paśla ŭklučeńnia — biez składanych pracedur kalibroŭki. Akramia taho, ludzi nie zachočuć nasić na sabie vialikija i dziŭnyja kanstrukcyi. Tamu raspracoŭščyki ŭsio bolš uvahi nadajuć dyzajnu.

Mahčymaść nabirać tekst siłaj dumki hučyć kruta, ale heta taksama vyklikaje pytańni nakont pryvatnaści i biaśpieki našych niejronnych danych. Raspracoŭščyk śćviardžaje, što ŭsie danyja šyfrujucca pierad adpraŭkaj u vobłaka, a madeli ŠI navučajucca niepasredna na zašyfravanych źviestkach.

Dla zabieśpiačeńnia nadziejnaści sistemy i abarony kanfidencyjalnaści kampanija supracoŭničaje z ekśpiertami pa niejrabiaśpiecy sa Stenfardskaha ŭniviersiteta, jakija pravodziać poŭny aŭdyt technałahičnaha pracesu.

• 3
• 1
• 0
• 2
• 0
• 0
• 0
• 0