ZŠA źniščajuć sudny narkahandlaroŭ, ale kakainu stanovicca ŭsio bolš, a ceny na jaho padajuć

Užo druhi hod amierykanskija vajskoŭcy nanosiać udary pa sudnach, jakija padazrajuć u pieravozcy narkotykaŭ. Za hety čas źniščanyja dziasiatki kataraŭ. Adnak patok kakainu nie spyniajecca, a ŭ ZŠA i Jeŭropie hety narkotyk praciahvaje tańnieć. Čamu tak adbyvajecca, raźbirałasia The Wall Street Journal.

Partyja kakainu, kanfiskavanaja Bierahavoj achovaj ZŠA. 19 listapada 2025 hoda. Fota: AP Photo / Rebecca Blackwell

Za 13 miesiacaŭ vajennaj kampanii ZŠA źniščyli bolš za 70 sudnaŭ, jakija, pavodle amierykanskich uładaŭ, vykarystoŭvalisia dla kantrabandy narkotykaŭ. U vyniku ŭdaraŭ zahinuli amal 240 čałaviek. U Vašynhtonie śćviardžajuć, što narkahrupoŭki stracili hruzy kakainu na $1,5 miljarda.

Donald Tramp nazyvaje apieracyju paśpiachovaj. U červieni jon navat zajaviŭ, što pastaŭki narkotykaŭ marskim šlacham skaracilisia na 97%. Adnak pravaachoŭniki i daśledčyki narkarynku apisvajuć zusim inšuju karcinu: kakain praciahvaje pastupać u ZŠA, Jeŭropu i Aŭstraliju ŭ vielizarnych abjomach. Pry hetym jaho košt padaje, a čyścinia zastajecca vielmi vysokaj.

Zamiest chutkasnych kataraŭ — kantejniery i hruzavyja karabli

Hałoŭnaja pryčyna ŭ tym, što narkahandlary prystasavalisia da novaj niebiaśpieki. Zamiest taho kab admovicca ad pastavak, jany stali vykarystoŭvać bolš raznastajnyja maršruty i sposaby pieravozki.

Asnoŭnym vytvorcam kakainu ŭ śviecie zastajecca Kałumbija, na jakuju prypadaje kala 70% jaho vytvorčaści. Značnuju častku hruzaŭ adsiul adpraŭlajuć praź Cichi akijan i Karybskaje mora. Amierykanskija ŭdary nakiravanyja pieradusim suprać chutkasnych kataraŭ, tamu kantrabandysty ŭsio čaściej chavajuć kakain u hruzavych kantejnierach, vykarystoŭvajuć rybackija łodki i paŭpadvodnyja sudny. A tyja, chto praciahvaje chadzić na chutkasnych katarach, starajucca trymacca bližej da bieraha.

Adzin z maršrutaŭ prachodzić uzdoŭž cichaakijanskaha ŭźbiarežža Kałumbii. Rybackija łodki pieravoziać narkotyk da Panamy, dzie jaho pierahružajuć na chutkasnyja katary i adpraŭlajuć dalej u krainy Centralnaj Amieryki abo Mieksiku. Adtul kakain traplaje ŭ ZŠA ŭžo pa sušy.

U najbujniejšym cichaakijanskim porcie Kałumbii, Buenavientury, palicyja ŭsio čaściej znachodzić tak zvanyja «parazity» — mietaličnyja jomistaści z kakainam, jakija kantrabandysty prymacoŭvajuć pad vadoj da karpusoŭ hruzavych karabloŭ. Narkotyk taksama chavajuć siarod zvyčajnych tavaraŭ, u tym liku ŭ vuhali, cemiencie, skurach žyvioł i sadavinie.

Vyjavić takija schovanki składana: navat z vykarystańniem skanieraŭ, słužbovych sabak i śpiecyjalnych testaŭ palicyja paśpiavaje pravieryć tolki kala 10% kantejnieraŭ, jakija prachodziać praz port.

Asnoŭnyja maršruty kantrabandy narkotykaŭ z Paŭdniovaj Amieryki ŭ ZŠA, Jeŭropu i Afryku. Infahrafika: The Wall Street Journal

Źmianiajecca i hieahrafija kantrabandy. Vieniesueła pa-raniejšamu zastajecca važnym punktam adpraŭki narkotykaŭ, ale ŭsio bolšuju rolu adyhryvajuć susiednija Hajana i Surynam, adkul kakain taksama pieravoziać marskim šlacham. Častku hruzaŭ nakiroŭvajuć na poŭdzień — praz Ekvador, Baliviju i Parahvaj. Adtul kantejniery spuskajucca pa race Paranie da Atłantyčnaha akijana.

Kantrabandysty vykarystoŭvajuć rehijanalnyja pahadnieńni ab tranzicie, jakija dazvalajuć pieravozić kantejniery praz Arhiencinu biez mytnaha nadhladu. Adnym z punktaŭ adpraŭki narkotykaŭ u Jeŭropu stanovicca Mantevidea, stalica Uruhvaja.

Inšy šlach prachodzić praz Amazoniju. Kantrabandysty vykarystoŭvajuć razhalinavanuju sietku rek, u tym liku Kakietu i Putumajo, jakija złučajuć addalenyja rajony Kałumbii ź Pieru i Brazilijaj. Tak hruzy pieramiaščajuć na ŭschod, u bok Atłantyčnaha akijana, adkul ich možna adpraŭlać u Jeŭropu.

Kantralavać hetyja šlachi nadzvyčaj składana: pa rekach praz džunhli štodnia chodziać łodki z praduktami, palivam i inšymi tavarami dla addalenych pasieliščaŭ. Siarod zvyčajnych hruzaŭ moža znachodzicca i kakain, ale pravieryć kožnuju łodku na sotniach kiłamietraŭ vodnych šlachoŭ siłaviki nie ŭ stanie.

Kakainu ŭsio bolš

Pra toje, što pastavak mienš nie stała, śviedčać i ceny na narkotyki. U Majami aptovy košt kiłahrama kakainu hetym letam składaŭ kala $16500, choć raniej zvyčajna trymaŭsia ŭ miežach $22‑25 tysiač. U niekatorych jeŭrapiejskich haradach cana źniziłasia jašče macniej — z $45 tysiač da $16 tysiač za kiłahram.

Pry hetym kakain staŭ nie tolki tańniejšym, ale i čyściejšym. U Jeŭropie jaho čyścinia časam dasiahaje 98%. Pastaŭki nastolki vialikija, što pradaŭcam usio radziej davodzicca źmiešvać narkotyk ź inšymi rečyvami, kab pavialičyć jaho abjom.

Asabliva prykmietnaja situacyja ŭ Francyi. U 2025 hodzie tam kanfiskavali rekordnyja 92 tony kakainu — na 204% bolš, čym u 2022-m. Ale navat takija abjomy kanfiskacyj nie spynili padzieńnia cen. Za apošniaje dziesiacihodździe vuličny košt hrama kakainu ŭ krainie źniziŭsia na 37%, a nievialikija pakunački pačali pradavać prykładna pa $11. Častka narkotyku, jaki traplaje ŭ Francyju, zatym razychodzicca pa inšych jeŭrapiejskich krainach.

Amierykanskija čynoŭniki pryznajuć, što avijaŭdary nanosiać narkahandlaram finansavyja straty i nie dazvalajuć niekatorym hruzam dasiahnuć punktaŭ pryznačeńnia. Adnak heta nie pieraškadžaje kantrabandystam znachodzić novyja šlachi. Prybytki zastajucca nastolki vialikimi, što navat ryzyka zahinuć padčas pieravozki nie spyniaje ludziej, asabliva ŭ biednych prybiarežnych rajonach Kałumbii.

Adzin z byłych kantrabandystaŭ raskazaŭ žurnalistam, što za adzin rejs ekipažu mohuć prapanavać kala $54 tysiač. Dla žycharoŭ biednych prybiarežnych pasieliščaŭ heta vielizarnyja hrošy.

Tym časam padpolnyja łabaratoryi krainy štohod vyrablajuć bolš za 3300 ton kakainu, a kolkaść udzielnikaŭ uzbrojenych hrupovak za čatyry hady amal padvoiłasia i dasiahnuła 28 tysiač čałaviek.

I pakul ZŠA źniščajuć katary z narkotykami, Kałumbija, pavodle źviestak AAN, vyroščvaje bolš koki i vyrablaje bolš kakainu, čym kali-niebudź u svajoj historyi.

Kamientary da artykuła