Šaŭcova i Huceryjeva aficyjna vyklučyli z sankcyjnaha śpisu Jeŭrasajuza
Rada Jeŭrapiejskaha sajuza aficyjna vyklučyła rasijskaha biznesmiena Michaiła Huceryjeva i biełaruskaha pradprymalnika Viktara Šaŭcova sa śpisu asob, na jakich raspaŭsiudžvajucca sankcyi ŭ suviazi ź situacyjaj u Biełarusi.
Michaił Huceryjeŭ i Viktar Šaŭcoŭ
Adpaviedny vykanaŭčy rehłamient Rady ES byŭ pryniaty 13 kastryčnika, a na nastupny dzień jon apublikavany ŭ Aficyjnym časopisie Jeŭrasajuza i nabyŭ moc.
Z sankcyjnaha śpisu, jaki viadziecca ŭ miežach rehłamientu Rady ES № 765/2006, vydalili dźvie pazicyi: № 125, u jakoj značyŭsia Huceryjeŭ, i № 258 — Šaŭcoŭ.
Rašeńnie pryniali paśla acenki adpaviednych abstavin pa prapanovie viarchoŭnaha pradstaŭnika ES pa zamiežnych spravach i palitycy biaśpieki. Nieaficyjna pra vyklučeńnie biznesmienaŭ sa śpisu sankcyj paviedamlałasia jašče 6 kastryčnika.
Padstavaj dla hetaha stali adpaviednyja rašeńni Ahulnaha suda Jeŭrapiejskaha sajuza ŭ Luksiemburhu. 13 maja stała viadoma, što sud skasavaŭ rašeńnie Rady ES ab padaŭžeńni ŭ 2025 hodzie sankcyj suprać Huceryjeva.
Sud pryjšoŭ da vysnovy, što na momant abnaŭleńnia sankcyjnaha śpisu ŭ 2025 hodzie Rada ES nie mieła dastatkovych i aktualnych dokazaŭ taho, što Huceryjeŭ padtrymlivaŭ režym Alaksandra Łukašenki.
Čytajcie taksama:
ES vyklučyć biznesoŭcaŭ Huceryjeva i Šaŭcova ź biełaruskaha sankcyjnaha śpisu
Sud Jeŭrasajuza admianiŭ sankcyi suprać Michaiła Huceryjeva
Michaił Huceryjeŭ źbirajecca pryjści ŭ biełaruskuju sielskuju haspadarku
Biznesmien Viktar Šaŭcoŭ dabivajecca vyklučeńnia jaho z sankcyjnych śpisaŭ