«Pieratvaryli rečy i fota ŭ popieł i raźviejali nad moram». Siamja biełaruski, jakaja źnikła ŭ Niepale, raźvitałasia ź joj

Suviaź z 41‑hadovaj haradzienkaj Kaciarynaj Sakovič abarvałasia 26 žniŭnia padčas katastrafičnaha sielu na niepalska-kitajskaj miažy. Jaje blizkija paśla spynieńnia pošukava-vyratavalnych rabot praviali simvaličnuju cyrymoniju pachavańnia.

Kaciaryna Sakovič. Fota ź jaje fejsbuka

Ułady Niepała aficyjna spynili pošukava-vyratavalnuju apieracyju jašče 6 kastryčnika. Z kitajskaha boku nijakich novych danych pra los turystaŭ i stan razburanaha pamiežnaha pierachoda taksama nie źjaviłasia.

Nie dačakaŭšysia viestak pra Kaciarynu, siamja vyrašyła pravieści simvaličnaje raźvitańnie. Blizkija spalili na vohniščy jaje rečy i fatahrafii, začytali słovy raźvitańnia ad siabroŭ, a popieł raźviejali nad moram.

«Ja lublu ciabie, siastryčka. Pabačymsia ŭ nastupnym žyćci», — napisała Daryna, a paźniej dadała jašče adzin dopis, źviernuty da Kaciaryny: «U ciabie, Kaciuša, dzivosnyja siabry, kalehi na pracy i ŭsie-ŭsie tvaje znajomyja i blizkija. Jany ŭsie ciabie lubiać, smutkujuć i žadajuć nam sił. U ciabie było ŭsio, pra što možna było tolki maryć».

Kaciaryna i Daryna. Fota: KaterinaSakovich / Telegram

Kaciarynie Sakovič byŭ 41 hod. Jana z Hrodna. U 2008 hodzie skončyła jurydyčny fakultet miascovaha filijała BIP — Instytuta pravaznaŭstva.

Apošnija 16 hadoŭ žančyna žyła ŭ italjanskim Miłanie, a niadaŭna atrymała taksama hramadzianstva Izraila. Kaciaryna zachaplałasia duchoŭnym raźvićciom, miedytacyjami i cialesnymi praktykami — dypłom śpiecyjalista ŭ hetym kirunku jana atrymała ŭ Indyi. Svaim dośviedam biełaruska dzialiłasia ź inšymi žančynami i ładziła retryty, u tym liku naprykancy lipienia hetaha hoda na italjanskim voziery Koma.

Afiša retrytu. Fota sa staronki Kaciaryny ŭ fejsbuku

Niahledziačy na doŭhaje žyćcio za miažoj, Kaciaryna sačyła za padziejami na radzimie i baluča ŭsprymała situacyju ŭ krainie. U 2022—2024 hadach u biełaruskich pratestavych telehram-čatach jana rezka vykazvałasia suprać režymu Łukašenki, pisała, što zakony ŭ Biełarusi bolš nie pracujuć, zaklikała da trybunała nad uładami.

U žniŭni 2026 hoda biełaruska vypraviłasia ŭ pałomnictva vakoł śviatoj hary Kajłas u Tybiecie, dzie płanavała prajści pieššu 52 kiłamietry na vyšyni da 5600 mietraŭ.

Pierad vyletam z aeraporta Bierhama 19 žniŭnia jana pakinuła ŭ fejsbuku pranikniony dopis: «Ludzi kažuć, što nasamreč ty nie «idzieš» da Kajłasa, ciabie tudy kličuć… Mnie prosta cikava, što adbyvajecca, kali ty zabiraješ siabie vielmi daloka ad usiaho znajomaha — i fizična, i ŭnutrana. Mahčyma, ničoha nie zdarajecca. Mahčyma, niešta i adbyvajecca. Kajłas, ja idu».

21 žniŭnia hrupa z vaśmi turystaŭ na čale z ukrainskim joham Alaksandram Biełym (jakaja ŭvachodziła ŭ bolš bujnuju hrupu pałomnikaŭ z 55 čałaviek ad niepalskaha turapieratara Leaf Holidays) vyjšła sa stalicy Niepała Katmandu ŭ bok kitajskaj miažy.

Rankam 26 žniŭnia ŭ 6:30 pavodle miascovaha času Kaciaryna dasłała ŭ siamiejny čat apošniaje videa — paviedamiła, što vyjazdžaje z pryhraničnaha pasiołka Cimure na pamiežny punkt Rasuvahadchi. Prykładna ŭ 8:30, kali pałomniki stajali ŭ čarzie na pierachodzie, paśla ziemlatrusu syšoŭ hihancki sielevy patok, a raka Bchote-Košy vyjšła ź bierahoŭ, całkam źniščyŭšy most i pamiežny kompleks.

Nastupstvy sielu ŭ Niepale. Fota: Safal Prakash Shrestha / Anadolu via Getty Images

Katastrofa zabrała žyćci bolš čym tysiačy čałaviek, bolš za čatyry tysiačy źnikli bieź viestak. Siastra Kaciaryny Daryna zdavała test DNK, kaardynavała pošuki praz dypłamataŭ niekalkich krain i asabista lotała ŭ Katmandu, kab šukać siastru pa miascovych balnicach, adnak ni Kaciarynu, ni inšych udzielnikaŭ jaje hrupy znajści tak i nie ŭdałosia.

Ciapier Daryna krytykuje tych, chto arhanizuje takija niebiaśpiečnyja tury. «Usie vašy retryty — biznes. Jany robiać hrošy na «duchoŭnaści», — piša jana.

Kamientary da artykuła