Kolkaść zahinułych u vyniku pavodki ŭ Niepale i Tybiecie nabližajecca da 500, ratavalniki čakajuć novaha ŭdaru stychii
Značnuju častku źnikłych składajuć turysty.
469 čałaviek stali achviarami katastrafičnaj pavodki, paviedamiła palicyja Niepała ranicaj u piatnicu, amal praz dvoje sutak paśla taho, jak na miažu z Tybietam syšoŭ sielevy patok. Bolš za 800 čałaviek pa-raniejšamu ličacca źnikłymi bieź viestak, piša Bi-bi-si.
U Tybiecie, pavodle danych kitajskich ŚMI, zahinuli jak minimum try čałavieki, jašče bolš za 550 čałaviek nie vychodziać na suviaź paśla pavodki. Značnuju častku źnikłych składajuć turysty. Praviadzieńniu vyratavalnych rabot pieraškadžaje pahroza novaj pavodki.
Premjer-ministr Niepała Balendra Šach, jaki naviedvaje paciarpiełyja rajony, zajaviŭ, što da pošukava-vyratavalnych apieracyj pryciahnutyja bolš za 13 tysiač supracoŭnikaŭ siłavych struktur — vajskoŭcaŭ niepalskaj armii, bajcoŭ uzbrojenaj palicyi i supracoŭnikaŭ nacyjanalnaj palicyi.
Na praciahu čaćviarha, pavodle jahonych słoŭ, u zonu biedstva było ździejśniena 69 avijarejsaŭ, u vyniku jakich udałosia vyratavać 573 čałavieki.
Šach dadaŭ, što dla paciarpiełych arhanizavanyja časovyja punkty raźmiaščeńnia, a paranienym hramadzianam akazvajecca biaspłatnaja miedycynskaja dapamoha.
Pavodle słoŭ premjer-ministra, ciapier urad zasiarodžany na vyratavańni ludziej, pošuku źnikłych bieź viestak i akazańni dapamohi paciarpiełym.
U čaćvier taksama źjavilisia papiaredžańni ab mahčymych novych kataklizmach.
Słužba pa nadzvyčajnych situacyjach Niepała papiaredziła, što raście ryzyka novaj pavodki: uzrovień vady ŭ voziery, jakoje ŭtvaryłasia ŭ vyniku zatoru z abłomkaŭ na race Bchote-Košy ŭ miescy pieršaj pavodki, pavyšajecca, i jano moža vyjści ź bierahoŭ. Heta moža adbycca kala 1 vieraśnia, paviedamili kitajskija dziaržaŭnyja ŚMI sa spasyłkaj na Ministerstva vodnych resursaŭ.
Kiraŭnik delehacyi Čyrvonaha Kryža ŭ Niepale Devid Fišer zajaviŭ BBC News, što heta trymaje ludziej «u najmacniejšym napružańni». Pavodle jahonych słoŭ, infarmacyja, jakaja pastupaje, upłyvaje na płanavańnie dastaŭki humanitarnaj dapamohi: kamandy Čyrvonaha Kryža dziejničajuć pastupova, «hruzavik za hruzavikom», i pakul nie stali vyvozić asnoŭnuju častku zapasaŭ sa svajho składa ŭ Katmandu.
«Bolš za ŭsio nas niepakoić pahroza žyćciu ludziej, jakija ŭsio jašče znachodziacca na šlachu mahčymaj novaj pavodki», — skazaŭ jon.
Ciapier čytajuć
Telegram vydaliŭ svoj aficyjny biełaruski kanał — vierahodna, kab nie padstaŭlać ludziej. Ale mnohija paśpieli padstavicca8
Kamientary