Bujny alejny zavod u Smarhoni ŭžo chutka pačnie pracu

U Smarhoni zaviaršajuć puskanaładačnyja raboty na druhim u Biełarusi alejna-ekstrakcyjnym zavodzie kampanii «Biełahraterminał», jakaja ŭvachodzić u mižnarodnuju hrupu «Sadružnaść». Pra heta paviedamlaje BiełTA.

Fota: Biełahraterminał

Pradpryjemstva sprajektavanaje dla pierapracoŭki roznych alejnych kultur. Tut buduć pierapracoŭvać raps, soju, lon, a taksama nasieńnie słaniečnika — novuju dla biełaruskaj haliny kulturu.

Paśla zapusku zavod stanie adzinym u Biełarusi pradpryjemstvam, jakoje pierapracoŭvaje ŭsie vidy alejnych kultur.

U Hrodzienskim abłvykankamie raźličvajuć, što novaja vytvorčaść dazvolić pavialičyć ekspart raślinnych alejaŭ i źnizić zaležnaść žyviołahadoŭli ad impartnaha šrotu. Raniej pradstaŭniki pradpryjemstva paviedamlali, što zavod zmoža zabiaśpiečvać da 50% patreb biełaruskaha rynku ŭ šrocie ŭłasnaj vytvorčaści — kala 300 tysiač ton na hod.

Hrupu kampanij «Sadružnaść» zasnavali ŭ 1994 hodzie sužency Alaksandr i Natalla Łucenki. U Biełarusi jany pačynali z handlu karmavymi dabaŭkami, a paźniej stvaryli adzin z najbujniejšych chołdynhaŭ pa pierapracoŭcy alejnych kultur. Vytvorčyja aktyvy hrupy raźmieščanyja ŭ Rasii, Biełarusi, Brazilii i Turcyi.

U 2024 hodzie paśla restrukturyzacyi biznesu rasijskija i biełaruskija aktyvy abjadnali ŭ kampaniju «Sadružnaść Rus».

Kamientary da artykuła