U Biełarusi zapuścili «Došku» — anałah zachodniaha Miro

U Biełarusi zapuścili servis «Doška» — anałah papularnaj płatformy dla sumiesnaj pracy z anłajn-doškami Miro. Sierviery novaha servisu i ŭsie jahonyja danyja raźmiaščajucca na terytoryi Biełarusi, piša Office Life.

Fota: doshka-online.by

Miro aficyjna spyniła pracu ŭ Biełarusi i Rasii ŭ sakaviku 2022 hoda. Adnak płatnyja akaŭnty biełaruskich karystalnikaŭ pačali adklučać tolki praz dva z pałovaj hady. Pieršapačatkova kampanija nie płanavała błakavać biaspłatnyja akaŭnty. Ale ŭ kastryčniku 2026 hoda Miro ŭviała hieahrafičnyja abmiežavańni, praź jakija karystalniki ź biełaruskimi IP-adrasami bolš nie mohuć uvajści ŭ svaje akaŭnty i atrymać dostup da aficyjnaha sajta płatformy.

Biełaruski servis «Doška» pracuje na 11‑ci movach. Heta nieabmiežavanaja pracoŭnaja prastora, dzie ŭdzielniki adnaho prajekta mohuć adnačasova stvarać schiemy, raźmiaščać natatki, pisać dakumienty i pravodzić zaniatki. Taksama praduhledžanaja mahčymaść pieranieści ŭ servis doški, stvoranyja raniej u Miro.

Karystalnikam dastupnyja natatki 12‑ci koleraŭ, paznaki dla ich i instrumienty hałasavańnia. Akramia taho, možna stvarać błok-schiemy, mientalnyja karty, kanban-doški dla arhanizacyi zadač i časovuju škału prajektaŭ.

Servis štodnia stvaraje reziervovyja kopii źviestak, a ŭsie sierviery znachodziacca ŭ Biełarusi.

Pakul «Doška» pracuje ŭ testavym režymie i zastajecca biaspłatnaj. Raspracoŭščyki papiaredžvajuć, što na hetym etapie mahčymyja pamyłki i karotkačasovyja pierapynki ŭ pracy płatformy.

Kamientary da artykuła