Biełaruskija repietytary ŭ panicy: praz prablemy «Jandeksa» jany mohuć stracić materyjały, jakija napracoŭvali hadami
Praz ataki dronaŭ na data-centry «Jandeksa» była stračana značnaja častka danych papularnych rasijskich adukacyjnych servisaŭ. Biełaruskija repietytary, jakija viali zaniatki anłajn ź ich dapamohaj, ciapier nie viedajuć, što rabić.
Jak stała viadoma «Našaj Nivie», u pieršuju čarhu havorka idzie pra rasijskuju anłajn-płatformu ProgressMe — tam zboi pracy pačalisia 10 kastryčnika. Hety servis dazvalaŭ stvarać i zachoŭvać adukacyjnyja materyjały (teksty, aŭdyja, videa, interaktyŭnyja praktykavańni), pravodzić interaktyŭnyja zaniatki, davać chatniaje zadańnie, jakoje vučań vykonvaŭ tam ža.
Asabliva papularna anłajn-płatforma była siarod vykładčykaŭ roznych moŭ.
Taksama na ProgressMe była mahčymaść nabyvać hatovyja kursy inšych aŭtaraŭ.
U repietytaraŭ, jakija aktyŭna karystajucca sučasnymi technałohijami, za hady pracy tam była sabranaja davoli vialikaja baza aŭtarskich materyjałaŭ.
Vykładčyk zamiežnaj movy ananimna rastłumačyŭ «Našaj Nivie» situacyju: «Ujavicie, što nastaŭnik ciaham piaci hadoŭ raspracoŭvaŭ aŭtarskija kursy dla roznych uzroŭniaŭ, zapisvaŭ dla vučniaŭ hałasavyja paviedamleńni, rabiŭ padborku niejkich videa pa temach… Absalutna nie fakt, što čałaviek tyja piać hadoŭ zachoŭvaŭ uvieś hety materyjał i ŭ siabie niedzie na kampjutary. Ciapier siarod maich znajomych repietytaraŭ jość tyja, chto prosta ŭ žachu, bo šmathadovyja napracoŭki zhubleny — prynamsi, pakul».
U telehram-kanale ProgressMe aficyjna paviedamili, što ŭ kamandy atrymałasia pieranieści 80% dadzienych karystalnikaŭ — uklučajučy roznyja ŭroki i materyjały: «Paralelna my pracujem nad uznaŭleńniem płatformy na novych sierviernych mahutnaściach, kab jak maha chutčej viarnuć vam dostup da zvykłaj pracoŭnaj prastory. Samaje hałoŭnaje — vašy materyjały zachavalisia, za ich zachavanaść možna nie pieražyvać».
Z ProgressMe taksama źviazany servis Edvibe — faktyčna, heta taja ž samaja płatforma, prosta aryjentavanaja nie na ruskamoŭnych karystalnikaŭ. Umoŭna kažučy, praź jaje repietytar ź Minska moh vykładać ruskuju movu vučniu z Brazilii. Ciapier na sajcie płatformy visić paviedamleńnie, što ŭvachod u sistemu časova niedastupny. Ale adznačana, što dadzienyja karystalnikaŭ nibyta ŭ biaśpiecy.
Jašče adzin rasijski servis, jakim aktyŭna karystalisia biełaruskija repietytary, — Online Test Pad. Jon bolš aryjentavany nie na praviadzieńnie zaniatkaŭ anłajn, a na pravierku viedaŭ. Ź jaho dapamohaj rychtavali da CT. Na płatformie vykładčyk moh stvarać testy z aŭtamatyčnaj pravierkaj, źbirać zadańni i adsočvać prahres vučniaŭ.
Sama anłajn-płatforma pryznajecca, što zhubiła častku dadzienych praz ataku bieśpiłotnikaŭ nočču 8 kastryčnika — bo jaje sierviery byli raźmieščany ŭ data-centry «Jandeksa».
«Heta stała pryčynaj niedastupnaści našaha sajta. Na žal, reziervovyja kopii dadzienych raźmiaščalisia ŭ tym ža data-centry, i na hety momant mahčymaść ich uznaŭleńnia zastajecca pad pytańniem».
Niekatoruju častku ŭžo atrymałasia adnavić, ale pakul što havorka idzie pra dadzienyja litaralna za niekalki dzion u 2023 i 2024 hadach. A ŭ 2026 — tolki dadzienyja za 18 žniŭnia ab zarehistravanych akaŭntach. Karaciej kažučy, kropla ŭ mory.
«Ciapier dać dakładnuju acenku imaviernaści ŭznaŭleńnia nie ŭjaŭlajecca mahčymym. U data-centry raźmiaščalisia tysiačy stojek, u kožnaj ź jakich znachodzilisia dziasiatki siervieraŭ; stupień ich paškodžańnia nie vyznačana. Supracoŭniki «Jandeksa» buduć apracoŭvać kožny siervier uručnuju, što moža zaniać niekalki miesiacaŭ. Tolki pa zaviaršeńni hetych prac možna budzie vyznačyć, ci mahčyma adnavić dadzienyja z peŭnaha sierviera».
Prahnozy nie vielmi aptymistyčnyja — karystalnikam rajać nie čakać cudaŭ: «U isnujučych abstavinach, kab paźbiehnuć zališnich čakańniaŭ, rekamiendujem zychodzić z taho, što dadzienyja stračany. Kali adnaŭleńnie ŭsio ž akažacca mahčymym, heta stanie dla nas i dla vas pryjemnym vyklučeńniem».
Abiacajuć, što ciapier pačnuć zachoŭvać dadzienyja karystalnikaŭ u roznych miescach — ale naŭrad ci heta vielmi suciašaje repietytaraŭ, jakija zhubili napracoŭki.
Tym, chto zachoča spynić karystańnie płatnaj viersijaj płatformy, abiacajuć viarnuć hrošy zhodna z taryfam.
U Biełarusi niemahčyma vyklikać «Jandeks-taksi» paśla ataki dronaŭ na data-centr va Uładzimiry
Ukraincy parazili dronami najbujniejšy data-centr «Jandeksa» ŭ Rasii
Paśla ataki dronaŭ na data-centr «Jandeksa» Runet nakryŭ maštabny zboj
Ukraina ŭpieršyniu ŭdaryła pa data-centry «Jandeksa». «Jandeks.Dysk» pracuje sa zbojami
Kamientary
ješče pryjdzie čas adnaŭleńnia cikavaści da kružełak łaziernych