U amierykanskim sieryjale pra palicyju ŭspomnili Biełaruś
«Marskaja palicyja: Śpiecadździeł» (NCIS) — vielizarnaja amierykanskaja telefranšyza, dziela jakoj za apošnija 23 hady źniali 8 sieryjałaŭ. U apošnim ź ich nie abyšłosia biez zhadki Biełarusi.
Sem Chana z naparnikam. Fota: CBS
6 kastryčnika na amierykanskim kanale CBS vyjšaŭ pieršy epizod «Marskoj palicyi: Ńju-Jork» (NCIS: New York). Heta vośmy sieryjał u suśviecie NCIS, franšyzy pra ahienctva, što rasśleduje złačynstvy ŭ amierykanskim fłocie abo tyja, da jakich datyčnyja amierykanskija maraki.
Novy sieryjał pabudavany vakoł Sema Chany, ahienta marskoj palicyi ŭ Ńju-Jorku, jaki razam sa svajoj kamandaj abaraniaje rodny horad. U pieršym vypusku Chana tolki viartajecca ŭ Ńju-Jork, bo jahony siabar i sasłužyviec znojdzieny miortvym, i płanuje sam rasśledavać hetuju spravu.
Fota: CBS
Padčas rasśledavańnia Sem z kamandaj vychodziać na mužčynu, jaki nibyta dapamahaŭ złačyncam, i toj raskazvaje im, čamu na heta pajšoŭ.
Akazałasia, što ciaham hoda Dejv — tak kličuć mužčynu — pierapisvaŭsia ŭ dejtynhavym dadatku z Katrynaj, pryhažuniaj ź Biełarusi. Za toj hod jany tak i nie sustrelisia, ale, zapeŭnivaje Dejv, jon nad hetym pracavaŭ i navat nabyŭ užo dla Katryny kvitok na samalot.
Ale ž zamiest sustrečy jon atrymaŭ infarmacyju, što Katrynu vykrali i jaje žyćcio pad pahrozaj. Kab abaranić dziaŭčynu, Dejv zrabiŭ toje, što ad jaho patrabavali złačyncy: pahadziŭsia pieravieźci najmitaŭ na łodcy, padkłaŭ na łodku svaje hrošy, kab pradstavić siabra Chany źviazanym sa złačynnaj dziejnaściu, a potym jašče i dapamoh złačyncam z ukryćciom. Kali Dejv raskazaŭ usio heta na dopycie, jamu patłumačyli, što nijakaj Katryny nie isnuje i jon, chutčej za ŭsio, pierapisvaŭsia ź niejkim Ivanam, jakomu byŭ patrebny čałaviek z łodkaj u Ńju-Jorku.
Rejtynhi ŭ sieryjała niebłahija — pieršaja sieryja nabrała na resursie IMDb 7,5 bałaŭ z 10 pa vodhukach hledačoŭ. U žyvym efiry jaje pahladzieli 5,49 miljona amierykancaŭ, i heta dobry pakazčyk dla tamtejšaha telebačańnia.
Čytajcie taksama:
U suśvietny prakat siońnia vychodzić «Kłara i Sonca». U hałoŭnaj roli — zorka «Uensdej»