U Biełarusi pakažuć film pra kiraŭnicu Theranos, asudžanuju na 11 hadoŭ za bujnoje machlarstva. Film bje ŭsie mahčymyja rejtynhi

19 listapada ŭ biełaruski prakat vyjdzie dakumientalny film «Ubačyć usio» — adna z samych abmiarkoŭvajemych kinapremjer siezona, jakaja atrymała amal maksimalnyja acenki krytykaŭ i hledačoŭ. Infarmacyju pra heta Onliner paćvierdziŭ pradstaŭnik dystrybutara «Volha».

Film studyi A24 raskazvaje pra byłuju kiraŭnicu kampanii Theranos Elizabet Chołms, asudžanuju za machlarstva. U centry ŭvahi — apošnija tydni pierad tym, jak Chołms adpraviłasia adbyvać 11‑hadovy turemny termin.

Niezadoŭha da źniavoleńnia jana sama zaprasiła zdymačnuju hrupu da siabie dadomu. I žurnalisty chadzili z kamierami ŭ jaje pa domie.

Adnak u pracesie zdymak film pieratvaryŭsia z partreta asudžanaj pradprymalnicy ŭ historyju pra manipulacyi, davier i miežy pamiž realnaściu i pastanoŭkaj. Praciahłaść karciny — amal try hadziny.

Prajekt režysioraŭ Niejtana Fiłdera i Łensa Opienhiejma doŭhi čas trymali ŭ sakrecie. Zdymki pačalisia ŭ 2023 hodzie, a ŭpieršyniu pra film stała viadoma tolki ŭ vieraśni 2026-ha, kali jaho pakazali na fiestyvali ŭ Tełurajdzie padčas tajemnaha sieansu.

Hledačy zahadzia nie viedali, jaki film ubačać, a pierad uvachodam ich paprasili prybrać telefony, kab nie dapuścić uciečak infarmacyi.

Niekatoryja krytyki nie skupiacca navat na zajavy, što režysiory litaralna vynajšli novy žanr i što suśvietny kiniematohraf jašče nie bačyŭ ničoha padobnaha.

Paśla premjery karcina vyklikała burnuju reakcyju. Na Rotten Tomatoes u jaje kala 99% stanoŭčych recenzij, a na Metacritic — 97%.

Acenki hledačoŭ (film «Ubačyć usio» ŭžo vyjšaŭ u kinateatrach ZŠA) taksama nadzvyčaj vysokija. Na IMDb na hety momant rejtynh karciny składaje 9,3 z 10, i jana zajmaje pieršaje miesca ŭ śpisie samych papularnych filmaŭ 2026 hoda. Na Letterboxd — 4,7 z 5 i dziaviataje miesca ŭ topie filmaŭ z najvyšejšymi acenkami za ŭsiu historyju servisu.

Film taksama paśpiachova startavaŭ u amierykanskim prakacie: za pieršy ŭik-end jon sabraŭ bolš za 18 miljonaŭ dalaraŭ pry biudžecie ŭ 7 miljonaŭ dalaraŭ. Heta najlepšy start dla dakumientalnych filmaŭ, nie pryśviečanych muzycy, za apošnija 22 hady.

Ciapier A24 maje namier vyłučyć «Ubačyć usio» na premiju «Oskar» nie tolki ŭ katehoryi «Najlepšy dakumientalny film», ale i ŭ hałoŭnaj naminacyi — «Najlepšy film».

Kali karcina trapić u lik naminantaŭ, heta stanie pieršym padobnym vypadkam u historyi premii. Akramia taho, studyja płanuje vyłučyć film u šerahu techničnych katehoryj, a aktrysu Amandu Sajfred, jakaja syhrała Chołms u scenach rekanstrukcyi padziej, — u naminacyi «Najlepšaja žanočaja rola druhoha płana».

Pavialičyć

U mai 2023 hoda zasnavalnica Theranos Elizabet Chołms była asudžanaja da 11 hadoŭ i 3 miesiacaŭ źniavoleńnia za machlarstva i padman inviestaraŭ svajho startapa pa testavańni kryvi, jaki paciarpieŭ krach. Prakurory prasili 15 hadoŭ.

Forbes nazyvaŭ Chołms samaj maładoj žančynaj-miljarderam u śviecie ŭ 2014 hodzie, kali joj było 30 hadoŭ, a jaje dola ŭ Theranos kaštavała 4,5 miljarda dalaraŭ. Theranos abrynułasia paśla taho, jak u 2015 hodzie ŭ Wall Street Journal źjaviłasia sieryja artykułaŭ, u jakich stavilisia pad sumnieŭ jaje technałohii.

Theranos ličyŭsia adnym z topavych prajektaŭ Kramianiovaj daliny apošnich dziesiacihodździaŭ. Na piku papularnaści kampanija aceńvałasia ŭ 9 młrd dalaraŭ. Elizabiet Chołms i kiraŭnictva Theranos abiacali revalucyju ŭ śviecie miedycyny i ŭ industryi achovy zdaroŭja.

Prybor pad nazvaj «Edysan» pavinien byŭ pa adnoj kropli kryvi z palca dyjahnastavać mnohija niebiaśpiečnyja zachvorvańni raniej za daktaroŭ. Chołms nazyvała jaho «ajpodam u miedycynie» i śćviardžała, što hety aparat nieŭzabavie źjavicca ŭ kožnym domie.

Siarod inviestaraŭ Theranos byli samyja viadomyja palityki i biznesmieny ZŠA — eks-prezident Bił Klintan, ministr adukacyi pry administracyi Trampa Bietsi Devas, miedyjamahnat Rupiert Mierdak, technałahičny mahnat Łary Elisan i mnohija inšyja. U radu dyrektaraŭ kampanii ŭvachodzili byłyja dziaržsakratary ZŠA Hienry Kisindžer i Džordž Šulc, a taksama eks-kiraŭnik Pientahona Džejms Mecis.

Cikavaść da Theranos vyjaŭlaŭ i Džo Bajden, jaki zajmaŭ tady pasadu vice-prezidenta ŭ administracyi Baraka Abamy.

• 5
• 0
• 3
• 0
• 0
• 0
• 0
• 0