Rasijskija miedyja zajavili, što ŭ Biełarusi pačali budavać łahiery dla raźmiaščeńnia «vahnieraŭcaŭ». Ale «Biełaruski Hajun» nie paćviardžaje
Siońnia žurnalisty rasijskaha vydańnia «Viorstka» paviedamili, što nibyta ŭžo pačałosia budaŭnictva łahiera ŭ Asipovičach na 8 tysiač čałaviek dla bajcoŭ PVK «Vahnier». Hetaja infarmacyja imhnienna razyšłasia pa mnohich miedyja. Ale manitorynhavaja hrupa «Biełaruski Hajun» śćviardžaje, što ničoha padobnaha niama.
«Viorstka» hruntavała svajo paviedamleńnie na infarmacyi z «biełaruskaha laśnictva», jakuju nibyta paćvierdziła i krynica, «blizkaja da kiraŭnictva Mahiloŭskaj vobłaści». Taksama jana spasyłałasia i na śviedčańni svajakoŭ udzielnikaŭ «Vahniera», praŭda, biez kankretyki, na padstavie čutak.
U toj ža čas manitorynhavaja hrupa «Biełaruski Hajun» zajaŭlaje, što pa stanie na 17:30 26 červienia možna adnaznačna skazać, što za minułyja sutki nie było zafiksavana nijakaj aktyŭnaści ŭ Asipovickim rajonie, nie kažučy ŭžo pra budaŭnictva takoha bujnoha abjekta.
«Adznačym, što vyklikajuć peŭnyja pytańni źviestki zamiežnaha (rasijskaha) vydańnia pra toje, što im udałosia atrymać kamientary ad krynic, blizkich da kiraŭnictva Mahiloŭskaj vobłaści. Pry tym, što biełaruskija niezaležnyja miedyja takich kamientaroŭ nie atrymlivali i infarmacyju pakul nie paćviardžajuć», — zajaviŭ «Hajun».
Manitorynhavaja hrupa taksama pakul nie fiksuje nijakich kałon PVK, jakija ruchajucca ŭ Biełaruś ci ŭžo znachodziacca ŭ krainie.
Kamientary