Apošnimi dniami raspaŭsiudžvajecca viersija, što prysudžanaha da śmiarotnaha pakarańnia ŭ Biełarusi hramadzianina Hiermanii Ryka Kryhiera mohuć abmianiać na aficera rasijskich śpiecsłužbaŭ Vadzima Krasikava. Čym admietny hety čałaviek?
Vadzim Krasikaŭ naradziŭsia ŭ 1965 hodzie na terytoryi Kazachstana. Słužyŭ u vojskach śpiecyjalnaha pryznačeńnia. Byŭ dvojčy žanaty, baćka traich dziaciej. Rasijskija žurnalisty dapuskajuć, što Krasikaŭ jašče z 2007 hoda byŭ źviazany z elitnym atradam śpiecnazu FSB Rasii «Vympieł».
U bijahrafii Krasikava niekalki epizodaŭ, źviazanych z zabojstvami. Tak, u 2007 hodzie jon razam z dvuma saŭdzielnikami zabiŭ pradprymalnika i deputata horada Kastamukša (Karelija) Juryja Kazłova.
U 2014 hodzie jaho saŭdzielniki byli zatrymany. Tady vyśvietliłasia, što jany — supracoŭniki FSB, jakija prachodzili słužbu ŭ «Vympiele». Praź niekatory čas mužčyny byli vyzvalenyja ź SIZA.
Praź piać hadoŭ, u 2013 hodzie, Vadzim Krasikaŭ staŭ hałoŭnym padazravanym u zamachu na biznesmiena z Nalčyka Albierta Nazarava, jakoha zastrelili ŭ Maskvie. Zabojca padjechaŭ da Nazarava na viełasipiedzie i niekalki razoŭ vystraliŭ u jaho.
U 2014 hodzie Krasikaŭ byŭ abvieščany rasijskaj palicyjaj u vyšuk praz Interpał. Pa nieviadomych pryčynach u 2015 hodzie ordar na vyšuk byŭ adklikany. Ale zdymak mužčyny zachavaŭsia ŭ bazach danych Interpała, što dapamahło jaho identyfikavać praź piać hadoŭ.
U 2019 hodzie achviaraj Krasikava staŭ były čačenski palavy kamandzir, uradženiec Hruzii Zielimchan Chanhašvili. Rasijskija bajeviki pieraśledavali Chanhašvili spačatku ŭ Hruzii, dzie jon pieražyŭ zamach, potym va Ukrainie i narešcie ŭ Hiermanii, dzie Chanhašvili padaŭ prašeńnie ab palityčnym prytułku i pražyvaŭ sa śniežnia 2016 hoda pad čužym imiem.
Kreml zajaŭlaŭ, što niekalki razoŭ nakiroŭvaŭ u Hiermaniju zapyty ab vydačy Chanhašvili jak datyčnaha da «nadzvyčaj kryvavych terarystyčnych aktaŭ i masavych zabojstvaŭ». Pucin havaryŭ, što Chanhašvili byŭ adnym z arhanizataraŭ vybuchaŭ u maskoŭskim mietro.
Jak vyśvietliŭ sud, Krasikaŭ pryjechaŭ u Jeŭropu pa pašparcie na imia Vadzima Sakałova — inžyniera-budaŭnika z Branska — i pa francuzskaj vizie.
23 žniŭnia 2019 hoda kiler padjechaŭ na viełasipiedzie da Chanhašvili, jaki nakiroŭvaŭsia pieššu praz park Tyrharten na piatničnuju malitvu ŭ miačeć. Zrabiŭ try streły ź pistaleta, u vyniku jakich mužčyna byŭ zabity na miescy.
Źniknuć Krasikavu pieraškodzili dva vypadkovyja śviedki. Jany paviedamili palicyi pra čałavieka, jaki ŭ kustach na bierazie Špreje vykinuŭ u vadu viełasipied i pistalet, źniaŭ paryk i chutka pieraapranuŭsia. Nieŭzabavie Krasikaŭ byŭ zatrymany.
Pryhavor Krasikavu był vyniesieny ŭ 2021 hodzie. Jon atrymaŭ pažyćciovaje źniavoleńnie. Niamieckija sudździ zajavili, što mužčyna dziejničaŭ pa zadańni rasijskich uładaŭ, jakija dali jamu falšyvaje paśviedčańnie asoby, pašpart i resursy dla ździajśnieńnia zabojstva.
Maskva raniej prykładała namahańni, kab vymianiać Krasikava, naprykład, na amierykanskaha žurnalista Hierškoviča, asudžanaha ŭ Rasii za špijanaž. U lutym 2024 hoda źjaviłasia infarmacyja, što vialisia pieramovy ab abmienie Vadzima Krasikava na Alaksieja Navalnaha.
Ciapier čytajuć
Łukašenka pieraabuŭsia: Pozna ŭviečary Minsk pahruzili ŭ ciemru. Navošta? Ja ž ad vas hetaha nie patrabavaŭ4
Kamientary