Zakryła saboj syna i dačku: u Kramiančuhu ŭ vyniku rasijskaj ataki zahinuła maci dvaich dziaciej
U vyniku abstrełu 29 kastryčnika zahinuła Hanna. Žančyna nie paśpieła pierajści ŭ biaśpiečnaje miesca da ataki, ale zakryła saboj dačku Ksieniju i syna Jahora, paviedamlaje «Suśpilnie».
«Siońnia razam z taboj pajšła častka mianie. Ja tak šmat tabie nie skazała, ja tak mała ciabie abdymała. Ty najlepšy, najśviatlejšy, najdabrejšy čałaviek u śviecie. Siońnia ciabie ŭ nas zabrali.
Aniuta, ciabie tak usie lubiać. Mnie niejmavierna ciažka ciapier padabrać słovy, ale ja biaźmiežna ŭdziačnaja tabie za ŭsio, što ty rabiła dla mianie, za tvaju dapamohu, luboŭ! Ty zastaniešsia ŭ maim sercy nazaŭždy. Ja budu lubić ciabie ŭsio svajo žyćcio! Ja zrablu ŭsio dla tvaich dziaciej, kab jany byli ščaślivyja!» — napisała dziaŭčyna.
Ina spadziajecca, što siastra «budzie abierahać svaich dzietak ź niabiosaŭ».
«Ichni tata vielmi mocny, i ja vieru, što jany razam ź dziećmi projduć hety nialohki šlach. Jahorka abaviazkova stanie futbalistam, jak i maryła jaho matula. I ja viedaju, što naša Ania ź niabiosaŭ budzie hladzieć na jaho i hanarycca. Ksienija budzie maminaj pryncesaj. Vyraście, budzie hatavać najsmačniejšyja desierty i radavać usich navokał», — dadała siastra zahinułaj.
Pachavańnie Hanny adbudziecca siońnia ŭ vioscy Pahraby na mohiłkach pa vulicy Šaŭčenki.
29 kastryčnika rasijanie trapili bieśpiłotnikam u šmatkvaterny dom u Kramiančuhu. Na miescy taksama hareli aŭtamabili i haspadarčaja pabudova. U vyniku abstrełu zahinuli try čałavieki, jašče 32 miascovyja žychary atrymali ranieńni, siarod ich było šaściora dziaciej. Dzieviać paranienych špitalizavali — 16‑hadovy chłopiec i 72‑hadovy mužčyna znachodzilisia ŭ ciažkim stanie.
Kamientary