Kampanija suprać Chełoŭina maje dalokasiažnyja mety

U tredsach i tyktokach sustrakajecca niamała krytyčnych vodhukaŭ na zabaronu Chełoŭina ad prostych ludziej. «Heta narmalna, što harbuzy zabaraniajuć?» — typovy aściarožny tejk.

Ułady niaredka mianiajuć pazicyju, kali adčuvajuć hramadskuju niezadavolenaść, ale heta nie raspaŭsiudžvajecca na palityčnyja pytańni. U pytańni śviata harbuzoŭ aźviaronki bieskampramisnyja.

«Zachodnija palittechnołahi vykarystoŭvajuć Chełoŭin jak instrumient raskładańnia našaha hramadstva. Pad vyhladam biaskryŭdnaj zabavy prasoŭvajucca čužyja kaštoŭnaści», — takija publikacyi naviazali ŭsim dziaržaŭnym ŚMI.

Łuchta. U anhłasaksonskich krainach Chełoŭin tradycyjna śviatkujuć: u ZŠA navat prezident sustrakajecca ź dziećmi ŭ karnavalnych kaściumach i doryć im słodyčy. U inšych krainach usio abmiažoŭvajecca viečarynkami ci harbuzami. Nichto tam ničoha nie «prasoŭvaje», kožny što choča, toje i robić.

Chełoŭin — heta nie bolš čym sposab paviesialicca ŭ zmročnyja vosieńskija dni. Heta nie pieraškadžaje, u tym liku našym susiedziam, adnačasova adznačać Dzień pamiaci prodkaŭ. U Polščy i Litvie 1 listapada — aficyjnyja vychadnyja, kab ludzi mieli čas pajechać na mohiłki, pamianuć. U susiednich krainach usie mohiłki raśćvitajuć źničami śviečak. Nam by tak šanavać pamiać pra svaich! U Biełarusi ž naadvarot, Dziady pierastali być vychadnym dniom pry Łukašenku, choć vychadny na dzień kastryčnickaha pieravarotu ŭ Rasii jon to zachavaŭ.

Možna spračacca, ci treba nam toj Chełoŭin. U našaj tradycyi moładź u strašnych maskach źbirała cukierki na Kalady. Ale chočuć dzieci i Chełoŭina, i Kalad — nu i na zdaroŭje, zdavałasia b.

Suprać Chełoŭina stolki šumu voś čamu. Dziaržaŭnaja prapahanda pravodzić dumku — absurdnuju, ale im jana padajecca darečnaj — što na Zachadzie bujnym ćvietam raśćviŭ satanizm. U rasijskich i łukašysckich kanałach pišuć, što satanisty vajujuć va Ukrainie, tajnyja satanisty kirujuć Francyjaj, što hłabalisty heta satanisty.

Raspalvańnie nianaviści da «inšych», raspalvańnie varožaści da narodaŭ Jeŭropy i Paŭnočnaj Amieryki, usie hetyja vydumki pra satanizm, jak i pra ŁHBT, hłabalistaŭ — heta baza łukašysckaj ideałohii. Jany robiać z muchi słana, kab ludzi paśla bajalisia taho słana.

U strachu pierad usim zachodnim, usim, što asacyjujecca z demakratyčnymi krainami Zachadu, ideołaham bačycca zaruka nieabmiežavanaha i viečnaha isnavańnia svajoj sistemy.

U saviecki čas zmahalisia z džynsami, džazam, rok-muzykaj, doŭhimi vałasami. U Paŭnočnaj Karei heta daviedziena da absurdu. I my ŭžo blizkija da taho samaha absurdu: KNDR u nas staviać u prykład, a biaskryŭdnaje dziciačaje śviata stała achviaraj ideałahičnaj kampanii.

* * *

Teksty ŭ rubrycy «Mierkavańni» mohuć supadać, a mohuć i nie supadać z pazicyjaj Redakcyi.

• 6
• 0
• 2
• 2
• 0
• 0
• 0
• 0