Kiroŭcy fur z dronami, što atakavali rasijskija aeradromy, raskazali, chto i navošta ich naniaŭ

Pavodle źviestak «Bazy», adzin z kiroŭcaŭ — 55-hadovy žychar Čalabinska Alaksandr — raskazaŭ, što ŭładalnikam mašyny źjaŭlajecca 37-hadovy Arciom.

Niekatory čas tamu jamu pastupiŭ zakaz ad pradprymalnika z Murmanskaj vobłaści, jaki paviedamiŭ, što treba arhanizavać dastaŭku čatyroch karkasnych damoŭ z Čalabinska ŭ Kolski rajon Murmanskaj vobłaści.

Mužčyny ŭzhadnili canu, paśla čaho Alaksandr pahruziŭ tavar u mašynu i adpraviŭsia ŭ darohu.

Pavodle słoŭ kiroŭcy, padčas ruchu ź im pa telefonie źviazvaŭsia nieviadomy i davaŭ ukazańni, dzie i ŭ jaki čas Alaksandru treba spyniacca.

U vyniku apošnim zadańniem byŭ prypynak la zapraŭki «Rasnafta» niepadalok ad aeradroma ŭ Murmanskaj vobłaści. Mienavita adtul i byli zapuščanyja drony.

Anałahičnuju historyju raskazaŭ i kiroŭca inšaj fury, 61-hadovy Andrej M. Jon paviedamiŭ, što pracuje kiroŭcam fury, jakaja taksama naležyć Arciomu, i jaho zadačaj było dastavić karkasnyja damy ŭ Irkuckuju vobłaść. Adnak u toj momant, kali kiroŭca pryparkavaŭsia la kaviarni «Tieriemok» va Usolli-Sibirskim, z mašyny pačali vylatać drony.

Padobnyja historyi raskazali i kiroŭcy fur, ź jakich byli zapuščanyja drony ŭ Razanskaj i Ivanaŭskaj abłaściach.

Tak, 46-hadovy Siarhiej paviedamiŭ śledčym, što vioz modulny dom z Čalabinska. I kali ŭjechaŭ u Razań, u jaho «skanii» padčas ruchu sarvała dach, i adtul pačali vylatać drony.

Čaćviortaja fura, ź jakoj učora zapuskalisia drony pa Ivanaŭskim aeradromie, taksama była zahružanaja ŭ Čalabinsku. I, pavodle słoŭ kiroŭcy, mašyna naležała tamu ž Arciomu.

Pavodle źviestak «Bazy», śledčyja raspačali kryminalnuju spravu pa artykule «terakt».

Zaraz jany šukajuć uładalnika mašyn — Arcioma. Pavodle papiarednich źviestak kanała, jon źjaŭlajecca vychadcam z Ukrainy.

Učora Ukraina atakavała rasijskija vajskovyja aeradromy. Jak piša «Ahientstvo», zhodna sa spadarožnikavymi zdymkami ci videa z avijabaz, Ukraina źniščyła i paškodziła jak minimum 13 samalotaŭ, ź jakich 11, vierahodna, byli całkam źniščanyja. Ź ich 10 — heta samaloty rasijskaj stratehičnaj avijacyi.

Pavodle źviestak daviednika The Military Balance 2024 Mižnarodnaha instytuta stratehičnych daśledavańniaŭ (IISS), usiaho ŭ Rasii 130 samalotaŭ Tu-22, 47 Tu-95 i 16 Tu-160. Heta značyć, što straty Rasii za adzin dzień mahli skłaści amal 8% ad usiaho fłotu jaje stratehičnaj (dalniaj) avijacyi.

Kali padliki ekśpiertaŭ dakładnyja, to kolkaść samalotaŭ, stračanych Rasijaj padčas hetaj ataki ŭ niadzielu, pieravyšaje ahulnyja straty stratehičnaj avijacyi Rasii za ŭvieś čas poŭnamaštabnaj vajny va Ukrainie.

Kijeŭ śćviardžaje, što paškodžanych samalotaŭ značna bolš, ale paćvierdžańniaŭ hetaj infarmacyi pakul niama.

Apytanka

• 2147
• 256
• 88
• 56
• 148
• 109
• 24
• 17