Tramp nakiroŭvaje Nachvardyju ŭ Łos-Andželesie, dzie iduć pratesty suprać palavańnia na mihrantaŭ
Prezident ZŠA Donald Tramp rasparadziŭsia nakiravać 2 000 žaŭnieraŭ Nacyjanalnaj hvardyi ŭ Łos-Andželes paśla taho, jak horad achapili masavyja pratesty suprać dziejańniaŭ fiederalnych imihracyjnych ahientaŭ. Hubiernatar Kalifornii Hevin Ńjusam asudziŭ dziejańni Biełaha doma jak «pravakacyjnyja», a ŭ horadzie prajšli sutyknieńni z udziełam pravaachoŭnikaŭ i demanstrantaŭ, piša Reuters.
Administracyja Donalda Trampa na fonie vostrych sprečak vakoł imihracyjnaj palityki ZŠA nakiravała Nacyjanalnuju hvardyju ŭ Łos-Andželes u subotu, paśla masavych pratestaŭ suprać rejdaŭ ICE (Immigration and Customs Enforcement) — imihracyjnaj i mytnaj słužby.
Jak paviedamiŭ Pientahon, kali pratesty buduć mieć hvałtoŭny charaktar, marpiechi «ŭžo na vysokaj hatoŭnaści».
U subotu na vulicach rajona Paramant i ŭ centry Łos-Andželesa sabralisia sotni demanstrantaŭ. Mnohija trymali mieksikanskija ściahi i skandavali: «ICE — preč z Łos-Andželesa!» Siłaviki ŭ supraćhazach vykarystoŭvali ślozatačyvy haz, a šerah ludziej byŭ zatrymany.
Prezident Tramp apublikavaŭ zajavu, u jakoj nazvaŭ situacyju «biesparadkami» i abvinavaciŭ mera Łos-Andželesa Karen Bas i hubiernatara Ńjusama ŭ «niazdolnaści vyrašać prablemu».
«Kali Ńjusam i mer Łos-Andželesa nie mohuć rabić svaju pracu, tady fiederalny ŭrad uniasie paradak, jak treba!» — zajaviŭ Tramp.
U adkaz na heta hubiernatar Ńjusam nazvaŭ dziejańni Trampa «namierana pravakacyjnymi».
Pratesty pačalisia paśla rejdaŭ ICE, padčas jakich byli aryštavanyja jak minimum 44 čałavieki, u tym liku i kala Home Depot, dzie pracujuć šmatlikija vuličnyja pradaŭcy i rabočyja. Pravaabaroncy paviedamili, što siarod zatrymanych mahli być ludzi z zakonnym statusam.
Ad pačatku svajho druhoha terminu Tramp abviaściŭ pra novy žorstki kurs na departacyju mihrantaŭ. Pavodle Biełaha doma, hetymi dziejańniami «zmahajucca ź biezzakońniem, jakoje kvitnieje zanadta doŭha».
Ciapier čytajuć
«Dzima, moj mikraskop za paŭmiljona jeŭra staić u tvajoj klinicy. Abstalavańnie skraŭ ty». Zasnavalnik «Novaha zroku» raskazaŭ pra adnosiny ź siamjoj Abielskich2121
Kamientary