Mikita Zabuha atrymlivaŭ uznaharodu ad Cichanoŭskaj u pahonach padpałkoŭnika. Jon raskazaŭ, jak tak

U Mikity Zabuhi bijahrafija bahataja. Baćka troch dziaciej, jon pryjazdžaŭ na Majdan u 2014‑m i ŭdzielničaŭ u raskopkach na terytoryi Litvy, dzie znajšli pareštki Kastusia Kalinoŭskaha i jaho paplečnikaŭ. Paśla 2020‑ha Zabuha ŭznačalvaŭ Hieraldyčnuju radu, jakaja raspracoŭvała dyzajn pašparta Novaj Biełarusi.

U krasaviku 2025‑ha Mikita abviaściŭ, što jon dałučyŭsia da Pałka Kalinoŭskaha i ciapier vykonvaje funkcyi staršyni pa zabieśpiačeńni padraździaleńnia BPŁA na Zaparožskim napramku. Praz hod, u mai 2026-ha, Zabuha prysutničaŭ na kijeŭskaj sustrečy Śviatłany Cichanoŭskaj ź biełaruskimi dobraachvotnikami. Na jaho formie možna było pabačyć dźvie zorki — znak taho, što mužčyna maje zvańnie padpałkoŭnika.

Biełarusy va Ukrainie aburylisia: zvyčajna zamiežnym dobraachvotnikam, jakija vajujuć za Ukrainu, nie dajuć vysokich zvańniaŭ. Jak takija pahony tady moh atrymać Zabuha?

Pavialičyć

Mikita Zabuha patłumačyŭ «Našaj Nivie», što na sustrečy byŭ u formie Biełaruskaj vyzvalenčaj armii (BVA). Heta prajekt pa stvareńni biełaruskich padraździaleńniaŭ u krainach Jeŭrasajuza i va Ukrainie, jakija ŭrešcie pavinny pajści vyzvalać Biełaruś.

Pahony padpałkoŭnika Mikita Zabuha prakamientavaŭ tak:

«Asoby, jakija prachodziać słužbu ŭ vajskovych, paramilitarnych i inšych arhanizacyjach, prajšli pravierku i zaličanyja ŭ skład BVA, atrymlivajuć vajskovyja zvańni ŭ adpaviednyja terminy słužby. Ja skončyŭ Akademiju MUS, i majo aficerskaje zvańnie ŭličana ŭ BVA».

Jon pryznaje, što jaho zvańnie padpałkoŭnika nie adpaviadaje ranhu va Uzbrojenych siłach Ukrainy:

«U USU ja raźličvaju na bolš ścipły aficerski ranh. My jakraz i prasoŭvajem ideju pryznańnia ranhaŭ BVA, ich tojesnaści paśla atrymańnia adpaviednaha navučańnia abo pasady ŭ vojsku Ukrainy».

U jakaści histaryčnaha prykładu Zabuha pryvodzić vojska hienierała Bałachoviča: «Jon nie čakaŭ dazvołu, i my nie majem takoj patreby».

Zabuha adkazaŭ, chto nadzialiŭ Biełaruskuju vyzvalenčuju armiju paŭnamoctvami:

«My majem pravy i paŭnamoctvy na padstavie Kanstytucyi 1994 hoda, jakaja zamacoŭvaje narod jak adzinuju krynicu ŭłady. My — pradstaŭniki naroda — stvaryli inicyjatyvu z šyrokim pradstaŭnictvam i prasoŭvajem našy mety i zadačy. Bolš za toje, my atrymali ŭchvaleńnie na farmavańnie BVA ad Rady BNR».

Pavialičyć

Siarod užo zroblenaha kamandaj, jakaja stvaraje BVA, Mikita Zabuha pieraličyŭ raspracoŭku sistemy ŭznaharod, uniformy i atrybutyki armii, sistemy vajskovych ranhaŭ pavodle standartaŭ NATA, pašparta Novaj Biełarusi.

• 35
• 2
• 12
• 32
• 1
• 0
• 0
• 3