Pamiatajecie staršyniu Hieraldyčnaj rady, jakaja raspracoŭvała dyzajn pašparta «Novaj Biełarusi»? Mikita Zabuha pajšoŭ vajavać

Na svaim pasiadžeńni 1 krasavika Kaardynacyjnaja rada abmiarkoŭvała prapanovu kamisii pa nacyjanalnaj i rehijanalnaj biaśpiecy ab farmiravańni mižnarodnych sił na terytoryi Jeŭrasajuza z udziełam biełaruskich dobraachvotnikaŭ.

U padtrymku hetaj prapanovy vystupiŭ Mikita Zabuha. Mužčyna źjaŭlajecca kiraŭnikom kampanii Pahonia, VšĮ, pad jakoj u Litvie zarehistravana Hieraldyčnaja rada.

Mikita Zabuha — heta biełarus-biznesoviec ź Litvy, jaki z pačatku 2000-ch aktyŭna ŭdzielničaŭ u roznych kulturnych i patryjatyčnych inicyjatyvach.

Vystupajučy na pasiadžeńni Kaardynacyjnaj rady, Zabuha raskazaŭ, što ciapier jon vajar-dobraachvotnik Pałka Kalinoŭskaha i časova vykonvaje funkcyi staršyni pa zabieśpiačeńni padraździaleńnia BPŁA na Zaparožskim napramku.

Pavialičyć

U svaim vystupleńni Mikita źviarnuŭ uvahu na historyju stvareńnia nacyjanalnych padraździaleńniaŭ na terytoryi inšych krain.

«My nie pieršaja i nie apošniaja nacyja, jakaja farmiruje svaju nacyjanalna-vyzvalenčuju armiju na čužoj ziamli. U našym vypadku heta prapanova miratvorčych padraździaleńniaŭ. Heta adbyvałasia jak u XIX, tak i ŭ XX stahodździach. I adbyvajecca zaraz», — adznačyŭ Zabuha.

U jakaści adnaho z prykładaŭ jon zhadaŭ armiju Halera ci «Błakitnuju armiju» (pa kolery mundziru) — polskaje vajskovaje dobraachvotnaje farmiravańnie, jakoje było stvorana ŭ čas Pieršaj suśvietnaj vajny ŭkazam prezidenta Francyi.

«Jana naličvała kala 200 tysiač čałaviek. Składałasia z dobraachvotnikaŭ-palakaŭ, jakija chacieli adnaŭleńnia polskaj dziaržaŭnaści, jakoj na toj čas nie było. Jany źjechalisia z roznych krain śvietu, u tym liku z Rasii. Antanta, u jakuju ŭvachodziła Francyja, bačyła vialikuju zacikaŭlenaść u tym, kab mieć hety vajskovy patencyjał. Padobnaja situacyja zaraz adbyvajecca ŭ nas», — davodzić Zabuha i zaŭvažaje, što «Błakitnaja armija» stała padmurkam sučasnaha polskaha vojska.

Druhi prykład — heta «Armija Andersa». Tak umoŭna nazyvajuć farmiravańni ŭzbrojenych sił Polščy, jakija byli stvorany ŭ 1941 hodzie na terytoryi SSSR pa damovie pamiž savieckim uradam i polskim uradam u vyhnańni. Jaje kaściakom byli polskija vajennapałonnyja, jakija znachodzilisia na terytoryi Savieckaha Sajuza. Siarod ich i žychary Zachodniaj Biełarusi.

Pa padlikach, jana naličvała zvyš 75 tysiač vajskoŭcaŭ. Viasnoj-letam 1942 hoda «armija Andersa» była vyviedziena z SSSR u Iran i ŭ lipieni 1943 hoda pieraŭtvorana ŭ 2-i polski korpus u składzie brytanskaj armii, jaki ŭ pačatku 1944 hoda byŭ nakiravany na italjanski front.

U 1918—1920 hadach za niezaležnaść Litvy vajavaŭ Biełaruski asobny bataljon, jaki raźmiaščaŭsia ŭ Kaŭnasie. Jak adznačaje Zabuha, 55 biełarusaŭ, jakija vajavali ŭ składzie bataljona, atrymali najvyšejšuju ŭznaharodu Litvy, a litoŭcam «nie zaminała toje, što jany vykarystoŭvali «Pahoniu» jak simvał padraździaleńnia».

Farmiravańnie nacyjanalnych vyzvalenčych armij na terytoryi inšych krain praciahvajecca i ŭ XXI stahodździ. Jaskravym prykładam, pa słovach mužčyny, źjaŭlajecca vyzvaleńnie Siryi. Doŭhi čas padraździaleńni Siryjskaj vyzvalenčaj armii farmiravalisia na tureckich bazach.

U kancy svajoj pramovy Mikita Zabuha zaklikaŭ Kaardynacyjnuju radu pryniać rezalucyju ab farmiravańni mižnarodnych sił na terytoryi Jeŭrasajuza z udziełam biełaruskich dobraachvotnikaŭ:

«Mnie pašancavała być biełarusam, jaki šukaŭ i znajšoŭ našaha nacyjanalnaha hieroja — Kastusia Kalinoŭskaha. Štodnia pracavaŭ z archieołahami amal dva hady na hary Hiedymina.

Pavialičyć

I było šmat času padumać, nakolki našym hierojam-paŭstancam było ciažej u paraŭnańni z našaj situacyjaj. Na siońnia my de-jure majem svaju Biełaruś. Tak, jana nie supadaje siońnia ź dziaržavaj, tamu što dziaržava ŭ nas hibrydna akupavanaja. (…)

Pavialičyć

Ja vas prašu razumieć, što kožnaja cahlinka, jakuju vy siońnia prymajecie ŭ biełaruskaść, zakładvaje budučyniu našym pakaleńniam. Tamu treba abaviazkova vykarystać hety histaryčny momant, jaki dajecca nam adzin na sto hadoŭ. I historyja vam nie daruje bajaźlivaści i niaŭpeŭnienaści, kali vy nie prymiacie hetuju rezalucyju. Našy braty i siostry, jakija znachodziacca ciapier u HUŁAHu, patrabujuć ad nas kankretnych dziejańniaŭ. Davajcie dapamožam Jeŭropie siońnia i budziem spadziavacca, što jana dapamoža nam zaŭtra».

Pavialičyć

• 57
• 6
• 1
• 10
• 0
• 0
• 0
• 4