Łukašenka: Razmova z Makronam doŭžyłasia 1 hadzinu 40 chvilin. Projduć pieramovy z pradstaŭnikom Francyi
Alaksandr Łukašenka raskazaŭ pra niekatoryja detali razmovy z prezidentam Francyi Emanuelem Makronam 24 maja. Łukašenka taksama zajaviŭ, što «było b niakiepska, kab možna było b u Litvie hruzić kalij»
Alaksandr Łukašenka raskazaŭ pra prośbu z boku francuzskaha prezidenta:
«Ja kažu: «Słuchaj, nu my z taboj razmaŭlajem — heta praktyčna adkrytaja suviaź. Pra što my možam z taboj pahavaryć? Paśla Jerevana ŭ Maskvu ty nie pryjechaŭ, u Minsk ty nie pryjechaŭ. Pra što havaryć?» Jon mnie kaža: «Spadar Prezident, vy možacie pryniać maju davieranuju asobu i ź joj pahavaryć, i kab jon pryjechaŭ i mnie ŭsio heta vykłaŭ?»
Łukašenka, pa jaho słovach, daŭ na heta svaju łaskavuju zhodu: maŭlaŭ, kali baicca pryjechać sam Makron, to chaj budzie choć pradstaŭnik.
«Dniami litaralna — u paniadziełak-aŭtorak (nie pamiataju) — hety čałaviek budzie tut. Nie chaču nazyvać jaho proźvišča. Jon (Makron. — NN) nazvaŭ kaardynaty. I my ź im (davieranaj asobaj. — NN) surjozna pahavorym. Heta jaho čałaviek, absalutna davierany, jon u temie. I ja jamu vykažu detalova ŭsie prablemy, jakija isnujuć».
Łukašenka taksama zajaviŭ, što «było b niakiepska, kab možna było b u Litvie hruzić kalij», ale kali nie, to taksama nie śmiarotna.
«My pryjšli da adzinaha mierkavańnia, što ŭsie pytańni jeŭrapiejskaj biaśpieki i Jeŭropy pavinny vyrašacca ŭ Jeŭropie. Nie Donald Tramp pavinien trapać tam nas pa hałavie i šturchać da miru ci jašče da čahości. A my pavinny vyrašać hetyja pytańni. Tamu što my niepasredna tut žyviom. I nie čakać, što nas niechta pasadzić za stoł jak dochłych kacianiat i prymusić rašać hetyja prablemy», — zajaviŭ Łukašenka.
Raniej paviedamlałasia, što 5—6 lutaha hetaha hoda Minsk naviedaŭ dyrektar departamienta kantynientalnaj Jeŭropy hałoŭnaha departamienta pa palityčnych pytańniach i biaśpiecy MZS Francyi Brys Rakfioj. Vizit adbyŭsia pa zaprašeńni biełaruskaha boku.
Francuzski pradstaŭnik sustreŭsia z namieśnikam ministra zamiežnych spraŭ Biełarusi Iharam Sakretam, a taksama pravioŭ «kansultacyi z pradstaŭnikami biełaruskaha ekśpiertna-analityčnaha asiarodździa».
Kamientary