«Hieroj Danbasa» zabiŭ i rasčlaniŭ siabroŭku i jaje 19‑hadovuju dačku
Rasijskija siłaviki zatrymali 47‑hadovaha Tejmuraza Hahijašvili. Byłoha bajevika bataljona «Sparta», paplečnika sieparatysta «Mataroły» padazrajuć u žorstkim dvajnym zabojstvie ŭ Maskvie.
Śledčy kamitet RF paviedamiŭ pra vyjaŭleńnie frahmientaŭ čałaviečaha cieła 3 kastryčnika ŭ kvatery na Žulebinskim bulvary ŭ Maskvie.
Zabitaj akazałasia 54‑hadovaja Alena Cereteli — byłaja žonka viadomaha maskoŭskaha restaratara Mamuki Cereteli. Častki jaje cieła byli spakavanyja ŭ pakiety i schavanyja na bałkonie, u kvatery siłaviki znajšli nažy i ślady kryvi.
Nastupnym dniom, 4 kastryčnika, u haražy Hahijašvili na terytoryi Novaj Maskvy śledčyja znajšli cieła 19‑hadovaj dački zabitaj žančyny — Darji. Pry ahladzie abodvuch miescaŭ złačynstva byli znojdzienyja zbroja i bojeprypasy.
Hałoŭnaje ŭpraŭleńnie MUS pa Maskvie abviaściła mužčynu ŭ vyšuk, nieŭzabavie jon byŭ zatrymany ŭ Varoniežskaj vobłaści pry sprobie ŭciokaŭ. Jak paviedamlaje dziaržaŭnaje ahienctva TASS sa spasyłkaj na krynicy ŭ pravaachoŭnych orhanach, Hahijašvili daŭ pryznalnyja pakazańni.
Pavodle infarmacyi vydańnia «Moskovskij komsomolec», złačyniec zabraŭ dziaŭčynu paśla treniroŭki, zavioz u svoj haraž nibyta za rečami i tam zastreliŭ. Paśla hetaha jon pajechaŭ u kvateru da jaje maci, zastreliŭ žančynu i rasčlaniŭ jaje cieła. Asnoŭnym matyvam zabojstva śledstva ličyć finansavyja roznahałośsi.
Ad bajevika «DNR» da supracoŭnika dziaržaŭnych ŚMI
U prakramloŭskich miedyja padazravanaha nazyvajuć «pradprymalnikam» i «fitnies-trenieram», adnak rasśledavalniki vydańnia «Važnyje istorii» identyfikavali jaho asobu.
Apublikavanyja danyja i fatahrafii paćviardžajuć, što Tejmuraz Hahijašvili byŭ bajavikom sieparatysckaha bataljona «Sparta» ŭ tak zvanaj DNR. Z 2014 hoda jon vajavaŭ u «pieršaj chvali» pad kamandavańniem Arsiena Paŭłava, viadomaha pad pazyŭnym «Mataroła», i vykarystoŭvaŭ pazyŭny «Hohi». Niekatoryja krynicy nazyvali jaho asabistym achoŭnikam Paŭłava.
Pavodle danych ukrainskich aktyvistaŭ, da pačatku vajny na Danbasie Hahijašvili, majučy hruzinskaje hramadzianstva, vučyŭsia ŭ Łuhansku na ekanamista, pracavaŭ mieniedžaram u łahistyčnych kampanijach i struktury «Sievierstali».
Aktyvisty śćviardžali, što jon dałučyŭsia da sieparatystaŭ paśla taho, jak uciok z Hruzii praź nievypłatu valutnaha kredytu i abvinavačvańni ŭ machlarstvie.
U pieryjad aktyŭnych bajavych dziejańniaŭ na ŭschodzie Ukrainy Hahijašvili byŭ žanaty z «ministram justycyi DNR». U 2016 hodzie padčas zabojstva «Mataroły» ŭ Daniecku źjaŭlalisia paviedamleńni ab tym, što achoŭnik zahinuŭ razam z kamandziram, adnak Hahijašvili vyžyŭ i zastaŭsia na akupavanaj terytoryi. Z 2019 pa 2021 hod, zhodna sa źlitymi bazami danych, były bajavik aficyjna pracavaŭ u Maskvie ŭ dziaržaŭnym miedyjachołdynhu MIA «Rośsija siehodnia». U 2021 hodzie jon pa sproščanaj pracedury atrymaŭ hramadzianstva Rasijskaj Fiederacyi. Paśla pačatku poŭnamaštabnaha ŭvarvańnia ŭ 2022 hodzie Hahijašvili, zachoŭvajučy maskoŭskuju rehistracyju, praciahvaŭ rehularna pierasiakać miažu z akupavanymi Danieckaj i Łuhanskaj abłaściami.
Kamientary